– Det blei svært vellukka i fjor og lysta til å gjenta dette er derfor absolutt til stades, kommenterer Solfrid Seim Nilsen, som saman med Aud Hege Jørgensen Hebnes, Eline Herheim og Bente Rasmussen utgjer arrangementsgruppa i Sauda Sentrumsutvikling.
Måndag og tysdag i komande veke er fylt opp med ulike aktivitetar på Rådhusplassen.
– Butikkane har ekstra lenge ope desse dagane og det er tenkt at telta som står på Rådhusplassen skal fungere som eit slags kafé- og mingleområde, forklarer Seim Nilsen.
Musikk for store og små, matsal og kviss er mellom ingrediensane i Sauda sentrum i neste veke. I fjor kom påska med strålande sol, medan det i år ikkje er like positive vêrmeldingar for starten av høgtidsveka. Det tar arrangementsgruppa med stor ro.
– Vi sett opp eit ekstra telt i år så alle skal få sitte tørt om det blir regn. Og viss det er litt kjøleg er det bare å kle seg. Det blir god temperatur i teltet, lovar Solfrid Seim Nilsen.
Det blir lagt ned ein god del dugnadsarbeid i samband med sentrumsarrangementet i påska. Og det er fleire enn dei som er tilknytt sentrum som bidrar.
– Dette er eit ressurskrevande arrangement og vi er derfor evig takksame for at såpass mange stiller opp for å hjelpe til, understrekar Eline Herheim.
Les meir i papirutgåva eller last ned eavis her