Bjørn Mørk er godt fornøgd med den snart 60 år gamle stålampen sin. Etter ei justering av det elektriske, lyser den nå godt opp i leilegheita hans. Foto: Ingvil Bakka.
Bjørn Mørk er godt fornøgd med den snart 60 år gamle stålampen sin. Etter ei justering av det elektriske, lyser den nå godt opp i leilegheita hans. Foto: Ingvil Bakka.

Sjekk den stålampen!

Den 1,40 meter høge lampen til Bjørn Mørk er laga av penisen til ein bardekval.

– Eg har sett eit bilde av penisen då den hang på kvalen. Då var den tre meter, fortel Bjørn Mørk.

Kreative sjøfolk
Inne i stova hans på Høllandstunet står stålampen han arva etter far sin, Hans Mørk.

Faren var kombinert matros og froskemann på kvalfangsbåten ”Thorshøvdi” i Nordishavet. Ein gong i perioden 1961-1962 fekk han laga seg to stålampar av bardekval-penisar. Ein lampe beheldt han sjølv, den andre gav han vekk til Oslo froskemannskole.

– Mellom kvaljakta var det lite å gjera på om bord på skipet, med hav rundt på alle kantar. Delane på kvalen blei brukt til å laga alt muleg, som for eksempel smykke og armband av barder, og altså lampar av penis, smiler Bjørn Mørk.

Godt brukande
Då Hans Mørk døydde på 1990-talet, fann sonen Bjørn den gamle stålampen faren hadde laga. Han har sidan hatt lampen lagra heime. Då han flytta inn på Høllandstunet fekk han ei lokal elektrikarbedrift til å fiksa det elektriske, og vipps, så var penislampen igjen både stødig og dekorativ – og kunne lysa opp i stova. Bjørn synest å hugsa at stålampen ein gong i tida hadde raud lampeskjerm, sjølv har han valt ein lysare variant.

Sjølve lampen er ganske tung å løfta på.

– Eg trur nok at det er bare er penisskinnet som er brukt, at den er fylt med noko. Peniskjøtet hadde nok rotna viss det ikkje hadde blitt fjerna, spekulerer Mørk.

Kjend i Odda
Bjørn Mørk kjem frå Odda, og han fortel at faren og penis-stålampen blei omtalt i Hardanger Folkeblad ein gong på 1980-1990-talet. Saka blei blant anna fanga opp av turistar som let seg fascinera av det unike møbelet.

– Ein gong fekk far min besøk av fem unge kvinner frå Kina, som ville sjå lampen, fortel Mørk.

Bardekvalar er ein underorden av pattedyra kvalar. Bardekvalane har som kjenneteikn at dei manglar tenner, men har bardar i overkjeden. Bardekvalane kan variera i størrelse frå ti meter og ni tonn (vågekval) og 30 meter og 120 tonn (blåkval).