Fjernar gran i naturreservat

– Grana blei planta ut for å skapa næring og skogsdrift. Nå vil me ha ho vekk, seier Reidar Sandal i Statens naturoppsyn.

Rundt 1960-talet blei det, i tråd med statleg landbrukspolitikk, planta til 2 millionar dekar med granskog på Vestlandet. Dette har gjort at det i Rogaland i dag er fleire store plantefelt med denne tresorten, som ikkje finst naturleg i fylket. Felles for plantefelt med gran er eit fattig artsmangfald. Skogen står tett og lite lys slepper ned til bakken. Strølag av barnålet lagar dessutan eit surt jordsmonn som hindrar andre planteartar å veksa. Resultatet blir lite vegetasjon på skogbotnen med svært få dyr og fuglar.

På Vikaneset, skogområdet nedanfor Hustveit og Jonegarden, blei det i si tid også planta til store plantefelt med gran. Området blei verna etter naturvernlova i 1984, og nå ønsker staten å fjerna tresorten private grunneigarar planta i det nåverande statlege og verna naturreservatet. Og det er ingen liten jobb.

Medan hommersåkmannen Vidar Rørvik har fått jobben med å fella og vinsja grantrea, har saudafirmaet Søndenaa skogsdrift as fått oppdraget med å kvista, kappa og kjøra fram tømmeret.

– I høgste grad hogstmodne tre. Fleire av trea er mellom to og tre kubikk og 25 meter høge, seier Geir Jostein Søndenaa, som saman med Njål Søndenå jobba i området i går, måndag.

Totalt reknar ein med at det finst mellom 600 og 700 kubikk gran i naturreservatet.

Edellauvskogen i Vikaneset naturreservat er blant dei mest verdifulle lauvtreområda i Ryfylke. Reservatet er om lag 215 dekar stort, og heile området frå fylkesvegen og ned til sjøen er verna. Tresortane ask, alm, eik, gråor, svartor og hegg dominerer. Området skal også ha eit allsidig og rikt plante- og dyreliv, med blant anna hjortevilt, fuglar og insekt.

Når grana nå blir fjerna frå området, trur Reidar Sandal at verneområdet vil få eit auka naturmangfald og større verneverdiar.

– Det vil bli eit ”ope sår” i landskapet ein del år framover, men her må ein tenka langsiktig. På sikt vil dette retta seg opp med at edellauvskogen veks fram der grana dominerte før, meiner Reidar Sandal frå Statens naturoppsyn.