Ivrar for samarbeid

Fagfolka i PP-tenestene i Vindafjord, Etne, Suldal og Sauda er få. Dei fire kommunane har difor starta ein diskusjon om eit nærare samarbeid om denne tenesta. Initiativet kom frå rådmannen i Sauda kommune i september i fjor.

– Eit veldig positivt møte, seier einingsleiar i Sauda kommune, Aslaug Tangeraas etter at representantar for kommunane tidlegare denne månaden kom saman for å drøfta vegen vidare.

Tangeraas fortel at tanken om interkommunalt samarbeid generelt veks seg stadig sterkare. Då også dei tilsette i den lokale PP-tenesta stilte seg positive til å sjå på moglegheitene for eit tettare samarbeid med nabokommunane, starta prosessen.

– Då var me veldig klare, alle. Det byrja med at rådmannen spurde dei andre kommunane om interessa for eit samarbeid, forklarer Aslaug Tangeraas.

Rådmennene snakka så med kvarandre før det vart kalla inn til møte i Ølen tidlegare denne månaden der fagkoordinator for PP-tenesta, Bente Baaserud og Tangeraas møtte for Sauda.

Aslaug Tangeraas opplyser at tre personar utfører 2,8 årsverk for PP-tenesta i Sauda.

– Flinke folk med god kompetanse, skryt ho.

Men krava til PP-tenesta er store, og i likskap med Sauda er det óg i dei tre andre kommunane få tilsette i tenesta. Få tilsette gjer tenesta sårbar, ifølge Tangeraas. Eit av spørsmåla framover er mellom anna kva ein kan vinna med å samla kompetansen i eit større fagmiljø. Ordet ”samla” betyr imidlertid ikkje at det vert teke sikte på ei fysisk samling av dei tilsette i eitt kontor.

– Stort sett skal dei tilsette ha sin arbeidsplass der dei er i dag, seier Tangeraas, og viser til moglegheitene dagens teknologi gir til å kommunisera med kvarandre.

For ingenting er bestemt enno. Konklusjonen etter møtet i Ølen er at alle fire kommunane er positive til å arbeida vidare med tanke på nærare samhandling mellom PP-tenestane. Ei arbeidsgruppe, med Bente Baaserud som representant for Sauda, er sett ned. Sauda kommune har sekretærfunksjonen for gruppa.

– Arbeidsgruppa skal vurdera moglege måtar å samhandla på og innan 1. mai legga fram ein sluttrapport med eitt eller to konkrete forslag til modellar for samhandling, forklarer Aslaug Tangeraas.

Deretter skal det vera eit felles møte der rådmennene i dei fire kommunane deltek.