Ny sjanse for kraftverk

– Prosjektet er veldig spennande, så me er tolmodige, seier Bjørn Sæle, Haugaland Kraft sin prosjektleiar for planane om å bygga Svandalsfossen kraftverk.

I morgon, onsdag, skal kommunestyret behandla og eventuelt uttala seg på nytt om det planlagte småkraftprosjektet i Svandalsfossen, fjorten månader etter at politikarane vedtok ein negativ høyringsuttale til prosjektet. Haugaland Kraft og Sauda Vekst inngjekk i fjor sommar ein intensjonsavtale om utviklinga av Svandalsfossen til ein attraktiv turiststad, og etter påtrykk frå næringsselskapet skal politikarane nå sjå på saka ein gong til.

Partiet Høgre var raskt ute og kravde ny behandling av saka, bare to månader etter uttalen i november 2008. Dei syntest uttalen blei fatta på eit mangelfullt og tynt grunnlag og etterlyste ei grundigare behandling av saka og meir fokus på mulighetene prosjektet kan gi for turistnæringa. Politikar Ivar Tangeraas er glad for at saka omsider kjem på bordet til politikarane igjen.

– Eg er overbevist om at Svandalsfossen med dette prosjektet vil bli ein endå meir attraktiv plass med fleire grunnar for turistar å stoppa opp. Eg håpar at også resten av kommunestyret ser desse mulighetene, seier Tangeraas.

Komunestyret var delt i meiningane om kraftplanane sist dei behandla saka. 12 stemte imot, medan sju representantar frå partia Høgre (3), Framstegspartiet (2), Senterpartiet (1) og Arbeidarpartiet (1) var positive til prosjektet.

Prosjektleiar Bjørn Sæle tar litt sjølvkritikk for at dei den gong fokuserte for lite på utviklingsmulighetene for området.

– Me kan få eit område med gamle oppgangssager og nytt kraftverk. Me hadde det med i planane sist også, men det blei nok for lite vektlagt, seier Sæle.

Planane for sjølve kraftverket er uendra. Intensjonsavtalen med Sauda Vekst, der kraftselskapet og næringsselskapet har ein felles strategi for utvikling av kraftverk, oppgangssag og fossefall, betyr større kostnader og meir arbeid for Haugaland Kraft. Det bekymrar ikkje Sæle.

– Bare kjekt. Positivt at me kan gå saman for å finna dei gode løysingane, seier han.

I sakspapira til morgondagens kommunestyremøte rår rådmannen kommunestyret til å vera positive til kraftutbyggingsplanane. I innstillinga føreslår han at kommunen stiller vilkår om minstevassføring i sommarmånadene og at kraftverket blir bygt i samsvar med planane som ligg i intensjonsavtalen mellom Haugaland Kraft og Sauda Vekst.

Også då saka blei behandla i kommunestyret i november 2007 hadde rådmannen ei positiv innstilling til utbyggingsprosjektet.