Pris og skryt til Herheim

– Eg visste ikkje om at dei hadde slike prisar og blei veldig overraska då eg fekk beskjed om at eg skulle få den, seier Egil Herheim, som onsdag fekk vete at han er kåra til Årets lærling i Nord-Rogaland.

Ryfylke Tverrfaglige Opplæringskontor (RYTOPP) har omlag 75 medlemsbedrifter og ansvar for oppfølging av rundt 100 lærlingar innan bygg- og anleggsteknikk. Nils Terje Hagen, opplæringskonsulent i RYTOPP, forklarar kvifor den 20-årige saudabuen, som har gått i lære i Ryfylke Bygg, har utmerka seg.

– Det er mange flinke lærlingar, og Egil Herheim er nok mellom dei aller flinkaste. Eg har blitt kjent med han, sett korleis han jobbar og fått tilbakemeldingar frå dei som jobbar med han til dagleg. Eg har følgt han opp i høve til mellom anna loggføring og dokumentasjon. Her har han vore flink, i tillegg til at han utfører det praktiske arbeidet på ein god måte. Herheim viser også interesse og er motivert for det han driv med, skryt Hagen, som var den som foreslo Herheim som kandidat.

Det blir stadig fleire fagarbeidarar i Rogaland. I løpet av 2009 har det vore 5 300 lærlingar og lærekandidatar under opplæring ved bedrifter og offentlege verksemder i fylket. Omlag 2 500 av dei fekk bestått fag- eller svenneprøven, der 37 personar er frå Sauda kommune.

Dagleg leiar i Ryfylke Bygg, Asle Rafdal, er ikkje i tvil om at det er fortent at prisen som Årets lærling går til Herheim.

– Det er tre ting som er viktige for ein tømrar. Ein må vere fagleg dyktig og ha forståing for faget. I tillegg må ein ha evne til å arbeide sjølvstendig og ha det eg kallar sosiale antenner. Dette er kvalitetar Egil Herheim har, forklarer Rafdal.

Herheim avla svenneprøve i fjor haust og jobbar no fast i Ryfylke Bygg. I går var han i Haugesund under den offisielle overrekkinga av svennebrevet og for å motta prisen som Årets lærling. Trass mykje skryt er prisvinnaren audmjuk.

– Dei kjem nok fram til ein vinnar etter ei heilskapsvurdering, men eg vil ikkje påstå at eg fortener den meir enn nokon andre, seier 20-åringen beskjedent.