Vil ha internat i Sauda

I formannskapet komande onsdag legg rektor ved Sauda vidaregåande skule, Espen Thompson, fram ønske om internat i Sauda.

– Eg håpar me kan få til eit internattilbod for elevane våre i Sauda med ein liknande strukturkvalitet som me har på internatet på Sand, seier Espen Thompson.

Ein av årsakene til at rektoren nå legg fram saka for formannskapet er den jamne nedgangen i folketalet i Sauda, som og gir mindre klassekull.

– Om seks-sju år vil det vere langt færre elevar som kjem frå ungdomskule til vidaregåande her i Sauda. Me kan då anten halvere skulen og drifta, eller gjere noko, seier Thompson, og siktar til eit betre tilbod til studentane.

– Me har i dag mellom 60 og 80 elevar som bur på hybel. Nokre av desse bur godt og har gode hybelvertar, andre er ikkje fullt så heldige. Dessutan slit mange med å få buplass til semesterstart, fortel Thompson.

Ifølge rektoren vil talet på elevar på hybel auke til hausten, då det alt er kome inn fleire søknader enn det er studieplassar på den nyoppretta ambulanselinja.

– Og dette er ein månad før søknadsfristen går ut. Eg trur det vil kome elevar frå heile fylket for å gå på denne linja. Me som skule vil jobbe for å få fleire nisjetilbod som ambulansjelinja og volleyballinja på Sand, men då må me ha eit god tilbod til elevane som er trygt, føreseieleg og held mål, meiner den engasjerte rektoren.

Saka skal opp i formannskapet kommande onsdag, og ordførar Laura Seltveit er positiv til intiativet.

– Eit internat vil nok vere positivt for skulen. Det er mykje lettare å senda 16-åringen sin på skule og hybel dersom ein har eit slikt tilbod. Nå er det viktig at formannskap og kommune får ei orientering frå Thompson, så får me sjå kva moglegheiter me har til å finna løysingar, kommenterer Laura Seltveit.

– Eg tek dette opp med kommunen fordi dei har eit ansvar for befolkninga i Sauda og dei sit på bygg og tomter. Me må vere saman om dette dersom me skal få det til, forklarer rektor Espen Thomspon.