Heilomvending om Svandalsfossen

Arbeidarpartiets Hallgeir Amdal var den første som tok ordet då saka om Svandalsfossen kraftverk kom opp i kommunestyret onsdag. Førre gong saka var til behandling i kommunestyret, i november 2008, vedtok fleirtalet å frårå at det vart gitt konsesjon for utbygging av kraftverket. Mette Seim frå Arbeidarpartiet, Framstegspartiet, Høgre og Senterpartiet utgjorde den gongen mindretalet som støtta planane.

Onsdag var det berre dei to representantane frå Venstre og Sosialistisk Venstreparti som stemte for å frårå konsesjon.

– Arbeidarpartiet har snudd i denne saka, konstaterte Hallgeir Amdal onsdag.

Vilkåra Amdal sette for å seia ja, er at det vert ei minstevassføring på ein kubikkmeter i sekundet i perioden 15. mai til 15. september. Dette er 14 dagar lenger enn kva Haugaland Kraft føreslo i sine planar.

Amdal forklarte at Ap legg vekt på argumentasjonen om at utbyggingsplanane vil gi stoppunktet langs Nasjonal turistveg auka attraksjonsverdi og slik vera eit bidrag til satsing på turisme og næringsliv.

– Årsaka til at Ap har snudd i denne saka er at tilbodet er blitt betre – argumentasjonen frå Haugaland Kraft og Sauda Vekst har verka. Me trur at i staden for at attraksjonen vert dårlegare ved utbygging kan den verta betre ved bygging av oppgangssaga, forklarte Hallgeir Amdal.

Amdal festa lit til at det vil vera mogleg å skapa næring i tilknyting til satsinga ved Svandalsfossen. Han la vekt på at det ikkje må leggast opp til at kommunen vert belasta driftsutgifter på stoppunktet, og viste til intensjonsavtalen der Sauda Vekst tek på seg ansvaret for restaurering og tilrettelegging. Han la óg vekt på at utbygginga vil skapa næringsgrunnlag i ei tid der det er vorte nødvendig å realisera alle ressursar for å oppretthalda drift og busetnad, og at sjølve utbygginga vil vera tenleg for næringslivet i byen. Han viste vidare til at utbygginga av fossen vil tena felleskassen til Sauda kommune og med det innbyggarane.

Kristeleg Folkepartis Wenche Øystese opplyste at også hennar parti har snudd og er med på å tilrå konsesjon for utbygging. Ho såg positivt på at ei utbygging med minstevassføring kan gi kommunen inntekter, skapa arbeidsplassar og gi eit visingsrom med mykje glas for den moderne kraftproduksjonen som i kombinasjon med den gamle oppgangssaga gir eit innblikk i historia.