Teknisk sjef seier opp

– Ikkje kvar dag det dukkar opp stillingar innan mitt fagfelt, seier Harald Halvorsen Løland.

Vanviksbuen med utdanning innan skogbruk og økonomi frå landbrukshøgskule, underteikna måndag kveld tilsettingspapira med rekneskapsfirmaet Tveit Regnskap as. Løland skal leia selskapet si avdeling i Sauda og Suldal.

Avdelingsleiarjobben er ei ny stilling i rekneskapsfirmaet. Ifølge dagleg leiar Jone Tveit vil Løland få mange landbruk- og skogbrukssaker å arbeida med. Selskapet har idag om lag 1700 jordbrukskundar og 2500 bedriftskundar.

– Me har mange bønder i Sauda og Suldal som kunder. Å føra rekneskap for bønder er grunnplattforma vår. I tillegg driv me med rådgiving og nyskaping innan landbruk og anna næringsliv. Arealplanlegging og driftsplanlegging hjelper me også til med, seier Tveit.

Avdelingsleiarstillinga til Halvorsen Løland er ei nyoppretta stilling som kjem som følge av at selskapet bygger seg opp i Indre Ryfylke.

– Sauda og Suldal har fram til nå lege under Skjold, men me har nå vakse såpass at me vil ha Sauda og Suldal som ei sjølvstendig avdeling, fortel Tveit.

Rekneskapsfirmaet har brukt tid på å leita etter ein avdelingsleiar for Sauda/Suldal-avdelinga si.

– Veldig kjekt å få med oss Harald Halvorsen Løland. Han er midt i blinken for oss med den kompetansen han har og hans veremåte, seier Jone Tveit.

Harald Halvorsen Løland har jobba som teknisk sjef i Sauda kommune i to år. Før dette var han prosjektleiar for kommunen sin utbyggingsplan for Svandalen. I nærare ti år har 34-åringen vore tilsett i offentleg sektor.

– Då det dukka opp ein slik jobb, måtte eg vurdera det. Då eg fekk tilbodet om stillinga gjorde dei det skikkeleg vanskeleg for meg. Det var inga lett avgjerd, vedgår Halvorsen Løland.

Han presiserer at det ikkje er noko dramatikk i at han nå vel å forlata teknisk sjef-jobben i Sauda, og at jobbskiftet kun handlar om ønsket om å jobba med fagfeltet han er utdanna i.

Halvorsen Løland blir i stillinga i Sauda kommune fram til 1. juni.

I sin nye jobb i Tveit Regnskap as vil han ha kontor i både Sauda og Suldal og ha seks tilsette under seg.