Historisk tunge tider

– Den tøffaste perioden bedrifta har vore i nokon gong, seier Knut Egil Halland, klubbleiar hos Saint Gobain Bøckman as, avdeling Sauda.

Truleg vil 18 årsverk blant dei totalt 62 tilsette ved bedrifta bli permittert dei komande vekene. I glasfabrikken si 25-årige historie har dei aldri hatt fleire enn ti permitterte om gongen.

I eit møte måndag kveld blei fagforeininga og leiinga einige om korleis dei skal gjennomføra dei uunngåelege permitteringane. 15 tilsette i produksjonen fekk permitteringsvarselet tysdag. Etter planen vil dei første ni tilsette bli tatt ut av arbeidet om halvannan veke. Dersom ingen uventa ordrar kjem inn dei næraste vekene, vil også dei seks andre bli permittert.

– I tillegg har me sett som krav at også tilsette i administrasjonen blir permittert. Er det mindre å gjera i produksjonen blir det også mindre å gjera på kontora, seier Halland.

Truleg blir derfor også tre tilsette i administrasjonen ramma av permitteringane.

Fagforeininga og leiinga har brukt ansiennitetsprinsippet når dei har bestemt kven som skal permitterast.

– Ein ryddig og sakleg prosess. Alle forstår at me ikkje greier å unngå permitteringar, seier Halland.

Glasfabrikken i Saudasjøen opererer i ein bransje der marknaden svingar veldig, men bedrifta kom seg gjennom heile finanskriseåret 2009 utan permitteringar. Ifølge plassjef Even Heimtun kan dette tilskrivast høge ordrereservar.

– I 2008 blei det sett i gang mange byggeprosjekt som ikkje let seg stoppa og måtte gjennomførast i 2009. Men i 2009 var det ein nedgang på 30 prosent i talet på areal i påstarta byggeprosjekt, forklarer Heimtun.

Klubbleiar Knut Egil Halland fortel at konkurransen på glasmarknaden stadig blir tøffare.

– Me måtte kjempa ganske mykje for å få tak i ordrar i 2009. Konkurransen med bedrifter i blant anna Polen og Estland gjorde at me fekk lite betalt for glasa våre, seier han.

Ifølge klubbleiar Knut Egil Halland kan ein risikera å måtta venta heilt til slutten av 2010 før den vanskelege situasjonen på marknaden snur.

– ”Forståsegpåarane” har spådd at 2010 blir eit dårleg år. Kanskje vil det stiga litt mot slutten av året. Men det er umuleg å vita. Me lever i ein bransje som vanlegvis bare ser ei-to veker fram i tid, seier Knut Egil Halland.