Kjempar for utebassenget

– Dette er det einaste fritidstilbodet me har i Sauda sommarstid. Trist dersom kommunen stenger bassenget, seier Arve Guggedal.

Guggedal har saman med læraren sin, Ruth Audny Klungtveit, og medelevane sine ved ungdomskulen engasjert seg for å behalde opninga av utebassenget i Sauda om sommaren.

– Det heile starta i januar då me skreiv ein del tekstar på skulen som handla om framtida. Det viste seg at fleire av elevane var opptekne av at kommunen vil stenge utebassenget i sommar. Dette engasjementet førte til at me danna ei gruppe på nettstaden Facebook, fortel norsklærar ved Sauda ungdomsskule Ruth Audny Klungtveit.

Gruppa har per dags dato 1 251 medlemmer.

Bakgrunnen for den varsla stenginga av utebassenget vart tatt opp i kommunestyret i desember i fjor. Då vedtok fleirtalspartiet Arbeidarpartiet å stenga utebassenget inntil teknisk eining har lagt fram ein kostnadskalkyle som gjer vidare drift forsvarleg ut frå gjeldande bassengforeskrifter. Anne Grethe Lindseth (Ap) peika då på at bassenget sleit med eit garderobebygg i forfall, eit røyrsystem som held på å bli øydelagt av trerøter og målingar som viser dårleg vasskvalitet. Vedtaket om å finna ut kor mykje det vil kosta å få utebassenget i god stand fører truleg til at bassenget ikkje blir opna til sommaren.

– Nå har dei brukt 14 millionar på noko som ikkje blei noko av, då bør dei klare å få i stand eit utebasseng, meiner Arve Guggedal, og siktar til forprosjektet til kulturverket.

Nå håpar elevane og læraren deira at engasjementet skal føre fram.

– Utebassenget er den einaste attraksjonen me har om sommaren. Kva med å sette det i stand, og kombinere med ein skatepark, til dømes, foreslår Sindre Hardeland.

Og det manglar ikkje på idear frå den samstemte gjengen.

– Kva med å ha ope vinterstid? Eller om ettermiddagen? Dette området har stort potensial, seier Klungtveit, før ho peikar på alternativa.

– Åbøbyen, vegen rundt Tangen, utebassenget, skatepark og treningssenter. Alt dette kan gjerast til ein flott rekreasjonsplass, og noko for turistar. Eg forventar at politikarane nå kjem på banen og bestemmer seg for kva juvelar som skal takast vare på her i Sauda, presiserer Ruth Audny Klungtveit.