Ambulanselinja populær

9. desember blei det klart at Sauda vidaregåande skule vann kampen om ambulanselinja til fordel for den vidaregåande skulen i Åkrehamn på Karmøy. Avdelingsleiar for helsefag, Oskar Waage Pettersen, framheva då at det å kunne tilby nisjetilbod var viktig for at skulen i Sauda skulle unngå å stå overfor eit skrekkscenario om nokre år.

– Dette med tanke på eit nedadgåande folketal og eit mindre elevgrunnlag, sa han då.

Spenninga kring kor mange som ville søke seg på ambulansefag har vore stor, men trua på at tilbodet skulle bli populært har vore der frå starten. Og det har vist seg at optimismen var berettiga.

I går gjekk søknadsfristen til vidaregåande skular i heile Norge ut. Ut frå talet på søkarar til ambulanselinja ved Sauda vidaregåande skule ser det ut som om det blir kamp om dei 15 plassane.

– Vi har 40 søkarar til denne linja, noko vi óg hadde tru på i forkant. Alt ein månad før fristen gjekk ut hadde vi over 20 søkarar. Heilt fantastisk! opplyser Waage-Pettersen entusiastisk.

– Det er primærsøkarane, ungdommane, som har førsteretten til vidaregåande skule. Men med eit søkartal som dette kunne vi utan problem ha fyllt opp både halvannan og to klassar, meiner Waage-Pettersen.

Det er fylket som har bestemt at det kun skal opprettast eit klasse.

– I utgangspunktet skal det berre vere 15 plassar og det forheld vi oss til. Argumentasjonen, slik eg har forstått det, er at Helse Fonna og sjukehuset i Stavanger har sagt at dei kan ta ansvar for å skaffe lærlingplassar til elevane våre. Eg og rektor Espen Thompson skal i møte med Helse Fonna, noko som indikerer at dei ønsker å høyre på oss og vil ha eit samarbeid. Då kan vi snakke om utplassering av elevar. Viss dei kan tenke seg å opprette fleire plassar, er det positivt. Det er opp til dei, men det kan godt hende at dei har bestemt seg for at 15 plassar er det dei kan takle nå, presiserer avdelingsleiaren.

Arbeidet med å skaffe kvalifisert fagpersonell til den nyoppretta linja er også i full gang. Skulen har søkt etter ein ekstra fagperson.

Søknadsfristen for fagpersonen går ut fredag denne uka. Sjølv om skulen ikkje har fått inn søknadar ennå er Oskar Waage-Pettersen ikkje veldig bekymra.

– Det er fleire personar som har kompetansen vi er ute etter som har kontakta oss. Det blir spennande å sjå om dei sender inn ein søknad. Får vi ikkje det nå i løpet av første utlysing, må vi prøve igjen, og gjerne kontakte folk. Det er fleire måtar vi kan løyse dette på. Vi kan ha inne ein person i fast stilling eller vi kan knytte til oss fagpersonell som kjenner systemet og som kan undervise innan ulike emne. Ein er jo alltid litt bekymra for at det ikkje skal ordne seg, men eg kan ikkje tenke meg at ambulanselinja skal komme til å stoppe opp, slår Oskar Waage-Pettersen bestemt fast.