Samlar seg om Rysteg

– Årsaka til at me nå går saman er at me ønsker å gi eit breiare tilbod, både for kundane våre og for dei som jobbar i bedriftene, seier den nyvalde styreformannen i Rysteg as, Bernt Jarle Dolmen.

Sauda Bedriftservice etablerte seg i Sauda for vel ti år sidan, medan Senit har vore i drift i Sauda i ein årekke då Senit var ei vidareføring av det som før heitte Sauda Produkter.

– Me vil nå kunne gi eit breiare tilbod både til dei som har behov for hjelp til å komme seg inn i arbeidslivet, og til dei som treng varig tilrettelagt arbeid. Dessutan vil me få betre kompetanse på leiarnivå når me får samla kunnskapen inn i ei bedrift, seier den nyvalde styreleiaren i Rysteg as.

Sauda og Suldal kommunar eig størstedelen av aksjane i både Senit og Sauda Bedriftservise som nå vil bli heitande Rysteg. Namnet på den nyetablerte bedrifta er ikkje tilfeldig.

– Namnet skal signalisere at dette er ei bedrift for Sauda og Suldal, og at me jobbar ut frå å gradvis ta steg for steg inn i arbeidslivet. Eit bra namn, synest eg, meiner Dolmen.

Håvard Rosnes skal vere dagleg leiar i Rysteg. Han var fram til samanslåinga dagleg leiar i Senit Arbeid og Kompetansebygging as.

Bernt Jarle Dolmen reknar med at det vil vere rundt 100 menneske som vil ha bruk for å få tilrettelagt arbeid gjennom Rysteg i løpet av eit år.

– Sauda Bedriftservice har omkring 50 personar innom i arbeid i løpet av eit år, og Senit har tilsvarande, kommenterer Dolmen.

Førebels vil bedrifta halde seg i den same lokala som tidlegare, med ei avdeling ute på Nesøyra og ei avdeling inne i sentrum. Det er likevel ting som tydar på at det kan komme ei endring når det gjeld lokalisering. Den gamle yrkesskulen på Nesøyra, som har vore eigd av Senit dei siste åra, er nå selt til Alsaker Eiendom as.

– Me vil halde fram med å leigelokale på den gamle yrkesskulen, men kor lenge er ikkje bestemt. Lokalisering er ein av tinga det nye styret i Rysteg nå vil jobbe med, forklarer Hans Sæther, nestformann i styret.