Snudde i veteriærsaka

– Viktig for bøndene og viktig for oss med hobbydyr, meinte Svein Ramsnes frå Senterpartiet då kommunestyret onsdag diskuterte det kommunale driftstilskotet til veterinæren.

Også Wenche Øystese frå Kristeleg Folkeparti ville sjå på saka på nytt etter at kommunestyret i desember, slik Øystese sa det, brukte ostehøvelen i dårlege økonomiske tider. Venstres Vegard Floa undra seg over at kommunen over ein tiårsperiode hadde utbetalt mellom halvannan og to millionar kroner til dyrlegen ut frå ein munnleg avtale, men utan nokon skriftleg avtale. Han viste óg til formuleringane til rådmannen i sakspapira om at også andre innsparingstiltak ikkje hadde vore godt nok utgreitt.

Til liks med Vegard Floa, trekte Arbeidarpartiets Mette Seim fram det positive i det store engasjementet saka har vekt. Ho håpa likevel at ein ved seinare underskriftskampanjar prøver å unngå at umyndige skriver seg på listene og at andre skriv seg på fleire gonger.

Eit samla kommunestyre vedtok så å bevilga eit årleg driftstilskot på 150 000 kroner til veterinærtenesta til Rune Bratås, og at han og kommunen må inngå ein femårig, skriftleg avtale.

– Eg synest det er bra for saudasamfunnet at politikarane snudde. Godt at dei ser heilskapen, kommenterer veterinær Rune Bratås vedtaket i kommunestyret onsdag.

Bratås forsikrar at han, nå når spørsmålet om driftstilskot har løyst seg, er klar til å fortsetta sin veterinærpraksis i Sauda.

– Ja, eg fortset som før for min del, seier Rune Bratås.