Siviløkonom leiar fabrikken

– Folk er overraska. Det er eg også, seier Kåre Bjarte Bjelland.

Kåre Bjarte Bjelland er utdanna siviløkonom og har dei siste ni åra drive rådgivarfirmaet KBB Scenario i kunnskapsparken til Eramet. Før han starta for seg sjølv var han i seks år tilsett ved smelteverket i Sauda som økonomisjef, som personalsjef og som analytikar med arbeidsoppgåver knytt til strategi og integrasjon. Etter endt utdanning jobba han dessutan fire år for Statoil i Stavanger. Men rein fabrikkdrift har han lite erfaring med, anna enn sommarjobbar i omnshuset i ungdommen.

– Men eg meiner eg kjenner erametsystemet godt. I mine ni år i KBB Scenario har nok i snitt 30 prosent av arbeidstida mi vore knytt til arbeid for Eramet, forklarer Bjelland.

Siviløkonomen vedgår likevel at hans manglande faglege og industrielle bakgrunn kan gi han utfordringar i jobben som fabrikksjef.

– Viss produksjonen ved ein omn har gått ned eit døger, må dei ikkje spørra meg korleis ein skal få den opp igjen. Eg har jo ikkje peiling på omnar og belte og slikt. Men eg er trygg på at dei andre tilsette sit på kompetansen, og denne mistar dei jo ikkje sjølv om dei har ein økonom som sjef, seier han.

Informasjonsdirektør ved Eramet Norway, Bernt Jarle Dolmen, seier smelteverket er svært glad for å få Kåre Bjarte Bjelland med på laget.

– Me er veldig fornøgd med denne tilsettinga. Me trur Bjelland vil vera ein god mann for oss, seier Dolmen.

Etter ni år i vesle KBB Scenario og fleire erfaringar frå oppstart og drift av minibedrifter, trur Bjelland at han kan få seg litt av eit kultursjokk når han nå skal ha det øvste ansvaret for drifta ved eit stort smelteverk. Hans nye rolle gir han ei sentral stilling i både det lokale næringslivet og i det norske erametsystemet.

Den nye fabrikksjefen tiltrer stillinga 15. mars.