Når angrep er det beste forsvar

Jenter på kurs for å læra ballespark.

Den lokale ungdomsforeininga Indre Ryfylke Sosialistisk Ungdom (IRSU) hadde invitert sentralstyremedlem og sjølvforsvarskurshaldar Ebba Boye til å kursa unge saudajenter i korleis forsvara seg mot mannlege overgriparar. Kurset hadde både ein teoretisk del der jentene blant anna snakka om grensesetting og ein praktisk del der dei fekk læra enkle triks for å komma seg ut av ubehagelege situasjonar.

Organisatorisk leiar av Indre Ryfylke Sosialistisk Ungdom, Carina Tangeraas, hadde godt utbytte av sjølvforsvarskurset.

– Eg har deltatt på delar av kurset tidlegare, og meiner det er kjempeviktig at alle jenter deltar på slike kurs. Dette bør inn i undervisninga på skulane, seier Tangeraas.

Ho utelukkar ikkje at IRSU set i gang fleire sjølvforsvarskurs i Sauda.

Kurshaldar Ebba Boye reiser rundt i Norge og kursar jenter i sjølvforsvar. Ho presiserer at målet med kurset er å læra jenter å gjera noko aktivt dersom dei hamnar i ein ubehageleg situasjon, ikkje bli lamma av skrekk og bli ute av stand til å gjera noko.

– Dette handlar ikkje om å gjera jenter til slåstkjemper, men å læra dei til å reagera, på ein eller annan måte. Poenget er å læra teknikkar og bruka ting ein alt kan på ein betre måte, fortel Boye.

Kurshaldaren forklarte jentene at det er viktig å forstå at det aldri er deira skuld dersom dei blir utsett for overgrep.

Eit tydeleg ”NEI!” er viktig, ifølge Boye. Pornofilmane sine unnvikande ”nei” frå kvinner betyr ja og gjer at mange overgriparar ikkje lar seg skremma av eit lite nei.

Etter ein gjennomgang av menns sårbare punkt, får jentene øva seg på slag og spark mot ein potensiell overgripar og blant anna læra korleis ein kjem seg ut av eit kvelartak.

– Poenget er at me skal skada overgriparen – og så stikka av, forklarer Boye.