Trakkar løyper i OL-stil

– Denne nye maskinen trakkar langt breiare spor enn den gamle. Det blir reine OL-løyper her ute nå, seier sjåfør av den nye trakkemaskinen til Ny Von, Bjørn Lund, fornøgd.

I februar blei den gamle trakkemaskinen, ein 1993-modell, bytta ut med ein 2003-modell. Den nye, ein Pisten Bully 100, blei kjøpt frå ein skiklubb i Nannestad.

– Ein av dei største forskjellane er at den nye har eigen motor på fresen. Det vil seie at den slepp å ruse motoren på trakkemaskinen for å frese snøen slik me måtte med den gamle, forklarer Knut Saua i Ny Von.

– Den kan køyre opp to skiløyper i trasén, men me velger å berre køyre opp ei løype slik at dei som vil gå skøyteteknikk får høve til det, fortel Saua, som så langt er fornøgd med den nye trakkemaskinen.

Den nyinnkjøpte 2003-modellen er den fjerde i rekka for idrettslaget Ny Von, og ifølge Saua kostar det både å kjøpe maskin og vedlikehalde utstyret.

– Me håpar at folk som set pris på å gå i trakka løyper på Lyngmyr og Nordstøldalen vil kjøpe såkalla andelsbrev på den nye trakkemaskinen vår, seier Knut Saua i Ny Von, og peikar på at det kostar å ha ein maskin.

I tillegg til å ha eigen motor på fresen og køyre opp breiare trasé, er det fleire fordelar med den nye trakkemaskinen skal me tru sjåføren.

– Betre komfort, mindre støy og truleg også lågare drivstofforbruk, utan at eg har nøyaktige målingar på det, seier Lund, som nå har halvert talet på arbeidstimar i løypene i Lyngmyrområdet.

– Tidlegare gjekk det fire timar å preppe løypene på Lyngmyr og inn til Nordstøldalen. Nå bruker eg berre to timar, fortel sjåføren, som nå har fått færre bekymringar i høve til arbeidsutstyr etter innkjøpet.