Gjorde comeback i alpinløypa

– Eg hadde lyst til å sjå om eg framleis heng med, seier Kjell Ånon Tellefsen.

27-åringen deltok laurdag i storslalåm i Saudarennet i Svandalen.

Tellefsen starta alpinkarriera si som tre-fire-åring og dreiv aktivt fram til han var sytten år. På merittlista hans står blant anna eit par krinsmeistertitlar, sørlandsmeistertittel og fleire gode resultat frå norgesmeisterskap.

Rygg- og kneskader etter fleire stygge fall gjorde at motivasjonen dalte og skia blei lagt vekk mot slutten av tenåra. Eitt år med snøbrettkjøring gjorde heller ikkje skiveprolapsen i ryggen noko godt, så etterkvart blei det slutt på all aktivitet i Svandalen for Tellefsen sin del.

Sidan den gong har han bare hatt seg ein liten tur i alpinbakken om lag ein gong i året.

Men etter nokre turar i skitrekket for eit par veker sidan kom lysta til å konkurrera tilbake.

– Eg fekk ei kjensle av at eg framleis hadde det inne. Eg har sakna den meistringsfølelsen. Det er jo gøy å stå på ski, seier han blidt.

27-åringens comeback-planar gjorde at også broren Erlend Hovland valde å stilla til start i skibakken denne helga. Det interne veddemålet gjorde brørne sugne på fart i løypa. Etter første omgang var det yngstemann Erlend som hadde den beste tida av brørne, fire sekund raskare enn Kjell Ånon.

– Dette var tungt, ei krevande løype, kunne Tellefsen sliten konstatera.

– Eg har ikkje musklar til å kjøra som dette lenger, meinte Hovland.

I andre omgang kjørte Tellefsen langt betre, samstundes som Hovland mista eine skia.

– Det gjekk veien, det. Eg stakk dermed av med sigeren over broderen, seier Tellefsen fornøgd.

Eigentleg hadde Tellefsen planar om å gjera combacket i super-G, men då dette blei avlyst, blei det storslalåm-konkurranse.

I løpet av dei ti åra som er gått etter at han la opp som syttenåring, har Tellefsen levd eit turbulent liv og gjort ting han ikkje er så stolt av. I dag er livet hans heilt annleis med ansvar for to barn og eit stebarn. Tidlegare var det far Kjell Vidar Hovland som tok det eldste barnebarnet med ut på ski i alpinbakkane. Nå vil Tellefsen sjølv vera med ungane sine på ski.

– Eg har lagt nokre tøffe år bak meg og fått andre interesser og verdiar i livet, seier Tellefsen om sitt nye liv som småbarnsfar – og alpinist.

Sjølv om deltakinga i storslalåmrennet laurdag gav meirsmak, tviler Tellefsen på at han vil gjera eit skikkeleg comeback med fullt kjør med treningar og konkurransar.

– Eg har ikkje tid til slikt lenger. Eg driv og utdannar meg innan bygg- og anleggsteknikk og går på skule på Sand, seier Kjell Ånon Tellfsen.

Fullstendig resultatliste frå Saudarennet finn du i papirutgåva.