Wapz imponerte i NM

I helga var det NM i cheerleading i Tønsberg. 38 utøvarar, i tillegg til foreldre, reiste frå Sauda med koffertane fulle av spenning. Mange av cheerleadarane i Wapz var nemleg NM-debutantar.

– Vi hadde med 14 tolvåringar som var heilt ferske. Vi hadde derfor ikkje forventa at det skulle gå så bra som det gjorde, vedgår leiar i foreldregruppa, Astrid Dolmen.

Wapz stilte med tre lag, cheer junior, cheer senior, betre kjent som Wapz elite, og partnerstunt. Dei to sistnevnte fekk bronse, medan dei yngste blei nummer seks. Laga konkurrerte både laurdag og søndag. Astrid Dolmen fortel om spennande minutt då dei endelege poenga blei lest opp finaledagen.

– Partnerstunt, som består av Mats Flydal Nørgaard og Ida Birkeland, har berre trent saman sidan januar. På laurdagen var dei først ute og var nok litt uheldige. Dei blei då liggande på ein sjetteplass. På søndagen gjorde dei ein kjempekonkurranse. Då resultata blei lest opp begynte dei frå botn. Då vårt lag ikkje hadde blitt lest opp før dei tre siste plassane blei offentleggjort var vi nesten i sjokk. Då var det kubjeller og sauebjeller og ein enorm jubel, ler Dolmen med ein stemme som er tydeleg prega av høge heiarop i helga.

Mats Flydal Nørgaard er veldig godt nøgd med NM-medaljen.

– Vi har berre trent eit par månader, men har gjort det beste ut av det. Vi hadde ikkje forventa å ta medalje i det heile tatt. Vi blei veldig glade då vi fekk beskjed om at vi hadde vunne bronse, då vi låg sist etter første konkurransedag, fortel han.

At cheerleadermiljøet i litle Sauda får fram lag som klarer å prestere på høgde med konkurrentar frå større byar meiner Astrid Dolmen er utøvarane sin forteneste.

– Det er nokre fantastiske jenter og gutar. Og dei har lært seg det dei kan sjølve. Dei bruker veldig mykje tid på treninga og har eit veldig pågangsmot. Eg trur dei har det kjempegøy, meiner Astrid Dolmen.