Lov å drikka vatnet på Breiborg igjen

– Etter ulykka kontakta me Mattilsynet og dei oppfordra oss til å ta prøvar av vatnet. Me tok prøvar fredag, og tok nye prøvar i dag, måndag. PH-verdien låg mellom 9,2 og 9,4 noko som er bra. Dermed blir forbodet oppheva måndag ettermiddag, opplyser Ørjan Djuv ved teknisk eining i kommunen.

Det var torsdag ettermiddag tankbilen frå Technor sin fabrikk i Saudasjøen begynte å leka hydrogenfluorid og salpetersyre.

Tankbilen var på veg til Austlandet med spesialavfallet då feil i den eine ventilen førte til at syrene byrja å leka ut på Riksveg 520 ved Breiborg. Ein annan bilførar gjorde tankbilsjåføren oppmerksam på at det lak syra frå ventilen, men då hadde han alt mista 300 liter av dei totalt 9000 literane syre bilen hadde med seg. Den giftige syra blei liggande over ei strekning på eit par kilometer.

Brannvesenet fekk melding om ulykka klokka 15.30 og kom til staden omlag 45 minutt etterpå. I lag med Viking redningstjeneste sperra dei vegen i begge kjøreretningar og dirigerte trafikken ned igjen. Politiet kom til Breiborg klokka 18.05. På grunn av faren for giftige gassar fekk ingen utan verneutstyr komme nærmare enn omlag 200 meter frå ulykka.

Då Ryfylke kom til staden omlag 75 minutt etter hendinga, hadde brannmannskapet sjekka hyttene i området for folk. Ingen var til stades, så evakuering var ikkje nødvendig.

Etter ulykka blei ei strekning på tre kilometer av vegbanen spylt og kalka for å nøytralisera syra, og vegen opna igjen klokka 07.00 fredag.

Likevel gjekk kommunen fredag ut med drikkevassforbodet.

– Området blei kalka og nøytralisert, og vatnet var nok ikkje særskilt farleg. Likevel ville me i kommunen ikkje ta nokre sjansar, for det er betre å vera føre var. Difor blei skilt med drikkeforbod sett opp på Breiborg, og avisene blei kontakta for at alle hytteeigarane i breiborgsområdet skulle bli klar over forbodet. Men nå går det altså an å drikka vatnet igjen, konkluderer Ørjan Djuv.