Ekslusiv litterær gjesteliste

– Det vert litteraturhelg i år óg, etter litt om og men, seier Sigmund Andersen i Sauda sogelag.

Andersen og sogelagskollegaene Anne-Brit Solland og Marit Rusten Birkeland røper at det var nokre økonomiske utfordringar å løysa. Men no er laget igjen klar til å arrangera litteraturhelga ”Sauda i verden – verden i Sauda”. Det vil skje siste helga i september.

Sikkert er det at Jan Erik Vold og Einar Økland kjem. Begge fyller 70 år, og ingen av dei treng nokon nærmare presentasjon.

Dei unge, nynorskskrivande kvinnene er representert ved Maria Parr og Kjersti Rorgemoen. Parr debuterte i 2005 med Vaffelhjarte – ei bok som skal verta sju episodar på NRK Barne-tv komande år. Vaffelhjarte vart óg nominert til Brageprisen, ein pris Maria Parr vann i 2009 med boka Tonje Glimmerdal. Parr har óg vunne Teskjekjerringprisen og Kritikerprisen for beste barne- og ungdomsbok.

Kjersti Rorgemoen, fødd i Vinje men busett i Bergen, debuterte i 2009 på Kolon forlag med Purkene snudde.

Gløymast skal ikkje at Guri Vesaas skal delta. Ho kan kanskje ikkje reknast som ung av alder lenger, men er mellom anna tidlegare forlagsdirektør og ansvarleg for Samlagets barnebokavdeling frå 1974 til 2006.

Totningen Håkon Paulsberg, visesangar og gitarist, står for det musikalske innslaget under krokvelden på Kløver som etterfølger festaftenen fredagen – også dette eit nytt innslag. På festaftenen er artisten ein kjenning frå fjorårets litteraturhelg, nemleg Aasmund Nordstoga. Han kjem saman med to musikarar.

– Eit anna arrangement er den litterære vandringa i Fløgstadåsen med Kjartan Fløgstad sundag føremiddag, seier Sigmund Andersen.

Også i år stiller Kjartan Fløgstad og Ola E. Bø opp. Bø leiar festaftenen fredagen og Fløgstad den litterære føremiddagen laurdagen.

Medan kantina på smelteverket tidlegare år har gitt plass til litteraturarrangementet, vert staden ein annan den siste helga i september.

– Hovudarrangementstaden i år er Stasjon III, med unntak av krokvelden på Kløver og barnelitteratur-innslaget med Maria Parr på Folkets Hus laurdag. Det vert spanande å vera i Stasjon III, og det er bidraget til Sauda sogelag for å visa at dette er eit bygg som kan brukast, seier Marit Rusten Birkeland begeistra.