Natteramnane i Sauda ser mindre til politiet

– Dei tre siste åra har natteramnane i Sauda sett mindre til politiet enn før. Men etter den nye vaktordninga, viser loggane våre at me har sett endå mindre til politiet. Kanskje er den nye ordninga bra for andre stader men ikkje ein stad som Sauda, trur dagleg leiar ved Sauda Frivilligsentral, Jane Nordhagen Ilstad, som nå har skrive eit bekymringsbrev til politimeisteren i Haugaland og Sunnhordland politidistrikt, Kaare Songstad.

– De kan skje hendingar som me ikkje kan ta oss av, og med den nye ordninga kan det ta tid før politiet kjem. Me ser politiet mindre og mindre, og me vil ikkje at det skal vera tendensen i framtida. Det høgaste ønske vårt er at politiet er til stades, seier den daglege leiaren.

For fleire år sidan hadde natteramnane i Sauda møte med politiet kvar laurdag for å høyre om tilstanden på byen og ”omlandet” og dei hadde høve til å stille politiet spørsmål om dei lurte på noko.

– Tett samarbeid med politiet er viktig og gir tryggleik for oss som er natteramnar. Me blir beroliga når me ser politiet i gatene og samtalane med politiet kvar laurdag er noko me saknar. Me vil gjerne fått til desse faste møta igjen, men ut i frå dagens politiorganisering går ikkje dette, og dette skreiv eg i brevet til Songstad, seier Nordhagen Ilstad.

– Me er ikkje fornøgd med utviklinga, og me set spørsmålstegn ved at dette samarbeidet eignar seg for ein stad som Sauda. Kanskje fungerer dette i meir tettbygde område, men ikkje her. For oss er det óg eit mysterium at kortare utrykkingstid er den nye verkelegheita av det nye vaktsamarbeidet når det gjeld Sauda. Sjølvsagt er det mogleg me tar feil, men då vil me gjerne ha statistikkar som viser dette, seier Nordhagen Ilstad, som i tillegg saknar utspel frå lokale betjentar om den nye ordninga og om dei opplever at den nye vaktordninga er betre for Sauda.

– Me tar misnøya til natteramnane på alvor, for dei gjer ein viktig og god jobb. Me vil gjerne komma dei i møte, men ein skal ikkje trekka koplingar til tenesteordninga, seier politimeister i Haugaland og Sunnhordland politidistrikt, Kaare Songstad.

Sjølv om det er ønskeleg å ha god kontakt med natteramnane, meiner han at ressursane til politiet skal brukast på akuttilfelle, og difor blir det vanskeleg å møta natteramnane fast kvar laurdag.

Han peikar på at det er viktig å ha god tenesteordning og at den nye vaktordninga gjer politiet meir aktivt enn før, då dei er i nærleiken av det som skjer.