Vil opna gjengrodde stiar

– Me får tella kroner undervegs. Det viktigaste er ikkje kva det vil kosta, men å få det gjort, seier fabrikksjef ved Eramet Sauda, Kåre Bjarte Bjelland.

Medan smelteverket i si tid hadde ei gartnaravdeling på hundre mann som stelte parkar og klipte tre og hekkar i Åbøbyen, var det ikkje like lett for den kommunale gartnaravdelinga å oppretthalda same standard då kommunen overtok vedlikehaldsansvaret i 1985. Dårleg kommuneøkonomi og manglande ressursar gjorde at vedlikehaldet av det gamle, erverdige parkanlegget Sneath’s park, midt i hjarta av Åbøbyen, i fleire år derfor blei nedprioritert. I dag har dei tre tilsette i gartnaravdelinga meir enn nok med å halda plenane nede og klippa hekkane i parken. Stiane inne i parkanlegget er heilt gjengrodd og ingen blomar er å sjå. Likevel er parken i dag langt betre vedlikehalde enn for bare eit par år sidan. Men ordførar Laura Seltveit vedgår at den historiske prydparken burde sett betre ut.

– Det har ikkje vore pengar eller ressursar til å gjera noko meir. Gartnaravdelinga har om lag hundre mål med plenar å ta vare på kvar veke, seier ho.

Eramet, med informasjonsdirektør Bernt Jarle Dolmen og fabrikksjef Kåre Bjarte Bjelland i spissen, har nå bestemt seg for å ta tak i saka og seier seg villig til å betala for ei oppsjaining av parkanlegget.

– Me vil opparbeida dei nå gjengrodde gamle stiane i parken, planta ut blomar og få på plass fleire benker, seier Bjelland, og minnar om at ei skikkeleg planlegging av utbetringsarbeidet er viktig.

For Eramet er det viktig å ikkje trakka kommunen på tæra, og ikkje setta standarden i parken så høg at det framtidige vedlikehaldet blir uoverkommeleg for kommunen.

Ordførar Laura Seltveit er både rørt og glad for initiativet Eramet har tatt når det gjeld Sneath’s park.

– Sjølv om parken i dag ikkje er så ille som den var for nokre år sidan, er dette eit flott initiativ. Me er glade for at smelteverket tar desse kostnadene og så får me gjera det me kan for å følga opp, seier Seltveit.

Irwin Birkeland er ein av mange saudabuar som lenge har etterlyst betre vedlikehald av både Sneath’s park og tennisbanane i Åbøbyen.

– Eg er kjempefornøgd. Veldig hyggeleg at private firma tar ansvar. Eg forstår at ei utbetring vil kreva auka ressursar når det gjeld vedlikehald, men det må me få ei ordning på. Kva om me får i gang ein lokal gjeng, kall det gjerne ”Parkens venner”, som med ujamne mellomrom kan stå på litt ekstra for å halda parken i stand? seier Birkeland blidt.