Ingen hybelhus i år

Ivar Tangeraas og Sverre Gustav Birkeland har lenge sysla med tankar om å bygga eit hybelhus for elevar ved Sauda vidaregåande skule. I mai i år gjekk eit einstemmig formannskap inn for at dei to saudabuane fritt får disponera den kommunale tomta i Torsveien til dette føremålet.

Men ifølge Tangeraas var det likevel ikkje økonomi i byggeprosjektet og han karakteriserer planane utan stønad frå det offentlege som eit reint tapsprosjekt.

– Det offentlege må nok på banen, anten gjennom kommunen eller fylkeskommunen. Eg trur eit hybelhus er viktig for at den vidaregåande skulen i Sauda skal overleva på sikt. Eit godt bustadtilbod er utruleg viktig å ha når ein har ein vidaregåande skule. Ein skule der leiinga er flinke til å få nye linjer lagt til Sauda og såleis skaffar fleire elevar til bygda, seier Tangeraas.

Talet på hyblar i det påtenkte framtidig hybelhuset har variert mellom 40 og 80. Prisen på bygginga kan enda på mellom 10 og 25 millionar kroner. Begrensa betalingsevner blant elevane gjer at ein ikkje kan ta kva som helst i leige for hyblane.

– Det vil aldri vera god butikk for nokon. Men for kommunen er ein vidaregåande skule med 3-400 elevar ei form for ”god butikk”, meiner Ivar Tangeraas.

Tangeraas og Birkeland har vore i samtalar med både Sauda Vekst og Sauda vidaregåande skule om hybelhusprosjektet. Nå er alle i tenkeboksen for å leita fram gode løysingar når det gjeld finansiering.