Sauda treng arbeidskraft

I samband med Sommarbeite 2010 har Sauda Vekst spurt nokre større lokale verksemder kor mange personar dei reknar med å ha behov for å tilsetta fram mot 2015.

Andreas Fløgstad, konsulent for Sauda Vekst, kallar resultatet ei aha-oppleving. Fem av dei spurde verksemdene har gjort overslag som viser at dei vil måtta rekruttera folk til oppimot 67 stillingar i åra 2011-2015. Då er ikkje Sauda kommune teke med.

– Mange av bedriftene seier at dei kan ganga behovet med to fram mot 2020, legg Fløgstad til.

Andreas Fløgstad presiserer at Sauda Vekst vil føra kartlegginga vidare ved å kontakta endå fleire verksemder.

– Me starta med nokre av dei store. Nå håpar me også fleire bedrifter ser nytta og vil vera med, seier han.

– På internettsidene til Nav ligg det per i dag tre ledige stillingar i Sauda. Me trur det reelle behovet er langt større enn det som vert reflektert gjennom stillingsannonsar, derfor ville me gjera denne undersøkinga.