Tingretten frifann Eramet

Etter arbeidsulukka ved Eramet i mai 2008 der Morten Klementsen omkom, gjekk enka til rettssak med krav om oppreisingserstatning. Ho meinte konsernet måtte ta på seg ein del av ansvaret for ulukka som skjedde under arbeidet med å fjerna ein silo.

Saka gjekk i Haugaland tingrett torsdag.

Ifølge rettsprotokollen meinte saksøkar ved sin advokat at retten måtte vurdera om Eramet etter dei ulovfesta reglane om organansvar skal betala oppreisingsansvar til saksøkar. I rettsprotokollen står det vidare at saksøkar meiner ulukker må forståast ut frå systemet dei skjer i, medan saksøkte synest å meina at dei må forståast ut frå dei val kvar einskild tek.

Saksøkar hevda at Eramet hadde neglisjert arbeidsmiljølova ved ikkje å sikra eit fullt forsvarleg arbeidsmiljø for alle, og peika på at arbeidsgivar hadde ansvaret for å fjerna siloen.

Eramet ved sin advokat hevda at konsernet ikkje hadde brote arbeidsmiljølova, og at HSM-systemet og –arbeidet var bra. Saksøkte viste til at Morten Klementsen var dyktig i jobben, alltid oppteken av tryggleik og ikkje redd for å seia frå. Eramet hadde ingen grunn til å tru at han ikkje ville følga instruksane.

Ifølge rettsprotokollen finn retten at ulukka ikkje kunne vore unngått sjølv om ein hadde følgt prosedyrane i høve arbeidstillating og sikker jobb-analyse (SJA). Retten finn vidare at det ikkje på noko tidspunkt var snakk om at menneske skulle inn i siloen, og er einig med saksøkte i at det ikkje ville vore fokusert på dette ved utarbeiding av slike dokument. Retten skriv óg at alt tyder på at dette er ei bedrift som tek HMS-arbeidet på alvor og har gode rutinar.

Retten har dømt saksøkar til å dekka sakskostnadane på 247 523 kroner.