Har ikkje 10 millionar

– Me har kome i ein situasjon der me er i ferd med å gå laus på dei 48 millionar kronene me har sett av til Etnevegen. Inneverande års budsjett er blitt saldert ved å bruka fem millionar kroner av fondsmidla våre. Kommunen har dessutan i dag ei gjeld på 240 millionar kroner, forklarer Alan G. Thompson, rådmann i Sauda kommune.

Thompson innrømmer at det var med tungt hjarte han råda kommunestyret å stenga utebassenget i vår.

– Eg ser absolutt ønsket og gleda i eit ope utebasseng, men det lar seg ikkje gjera med den økonomiske situasjonen i kommunen i dag, seier Thompson.

Sett i lys av den økonomiske situasjonen kommunen er i, meiner rådmannen at knallharde prioriteringar må til.

– Noko MÅ me ta nå – andre ting MÅ venta. Me MÅ ha ny ungdomsskule og ha orden på kloakken. Me må vera veldig forsiktige i investeringane våre og tenka oss godt om når me har valmuligheter. Me har mange, store investeringar rett framfor oss i tid. Då må det prioriterast. Derfor har kommunen konkludert med å legga vekk utebassenget, seier rådmann Alan G. Thompson.