Gifta seg utandørs

Med 84 gjester og tallause kvitrande småfuglar som vitne gav Kristin Næss Øye sitt ja til Alf Jostein Årtun. Vielsen var den første som blei gjennomført utandørs i Sauda. Den nybakte kona var ikkje i tvil om at Tveittunet var staden ho ville gifte seg på.

– Då vi bestemte oss for at vi skulle gifte oss, var det ikkje tvil om kor. Å gifte meg ute er noko eg alltid har tenkt på, fortel ho.

Sjølv om det var første gong nokon gifta seg utandørs i Sauda, er det ikkje uvanleg at vielsen blir flytta ut frå kyrkja andre stader i Norge.

– Eg har ikkje nokon statistikk på dette, men ein del stader er dette vanleg. Viss folk har minne eller opplevingar knytt til ein spesiell stad ønsker dei gjerne å gifte seg der. Det var jo eit par som blei via på Preikestolen, ler prest Oddvar Nessa.

Det er imidlertid ikkje så enkelt at ein kan gifte seg kor ein sjølv ønsker. Ifølge presten må staden ein giftar seg på vere godkjent sentralt og av biskopen på førehand. I Sauda er det etter det Ryfylke kjenner til kun Tveittunet som har ei slik godkjenning.

– Vi kunne gifta oss andre stader og, men då måtte vi ha søkt. Men Tveittunet er ein flott stad og har dei omgivnadane vi ønska oss, seier Kristin Ness Øye.