Treng meir pengar til Almannajuvet

Staten har gått inn med 38 millionar kroner i Almannajuvet, og Sauda kommune, Sauda Vekst og Rogaland fylkeskommune har skaffa 10,6 millionar kroner. No er dei tre sistnemnde partane utfordra til å vera døropnar for å bringa fram ytterlegare sju millionar kroner. Det tyder at Nasjonale turistvegar tek høgde for at sluttrekninga kan enda på over 50 millionar kroner.

– Me veit ikkje kva bygga vil kosta, seier prosjektleiar Arne O. Moen i Nasjonale turistvegar.

– Investeringa i parkeringsplassen i Almannajuvet trur eg nærmar seg 15 millionar kroner, med grøfter for vatn og kloakk og kummar for reinsing, opplyser prosjektleiaren.

Dette er ein sprekk på 12 millionar kroner berre i denne delen av prosjektet.

Arne O. Moen framhevar at Nasjonale turistvegar er svært opptekne av at arbeidet som vert gjort skal halda høg kvalitet.

– Me er veldig nøye på å få eit handverksmessig godt resultat, så får me heller bruka litt meir tid, konstaterer han.

Likevel, Moen peikar på stigande prisar i entreprenørbransjen som ein grunn til prisauken. Og enno er ikkje anboda på sjølve bygga som skal reisast i Almannajuvet – eit servicebygg og tre småhus – lyste ut. Det håpar Moen kan skje i vinter. Før han ser prisane i desse anboda, har prosjektleiaren lite lyst til å nemna konkrete tal for sluttrekninga.