Siktar mot toppen

Alt mot slutten av førre sesong begynte Robin Handeland å tenke at han ville frigjere meir tid til trening slik at han kan bli ein betre skiskyttar. For to veker sidan gjekk han ut i permisjon frå jobben i Sauda Installasjon.

– Vi begynte å planlegge dette rett etter sesongslutt. Det var ikkje noko problem å få permisjon. I første omgang blir det fram til april neste år og så får eg forlenge den viss økonomien tillet det, forklarer 20-åringen.

handeland trur ikkje det er urealistisk å nærme seg dei beste i verda.

– Fartsmessig er eg ikkje langt unna på eit lite strekk, men eg har ikkje trening nok til å hevde meg heilt ennå. Eg treng meir styrke i armar og bein. Men når eg får trent skikkeleg er det ikkje urealistisk at eg kan komme meg ut i europa-cup. Det er målet, og seinare er det verdens-cup, stadfestar idrettstalentet.

I fjor trente Robin Handeland 5-600 timar i løpet av året. Medan han fortsatt var i arbeid trente han i gjennomsnitt 15 timar i veka. Nå reknar han med at treningsmengda nærast skal doblast.

Skiskyttaren ser fram til å kunne ha fullt fokus på treninga. Han hadde det tungt like før han gjekk ut i permisjon.

– Det blei litt mykje. Eg blei sett ut av pollenallergi, gjekk eit dårleg testløp og mangla rett og slett restitusjon. Nå har eg fått betre tid og merkar at forma er stigande. Eg har persa på eit testløp og er ganske gira. Heilt herleg! meiner den blide Sauda-guten.