– Det er bare å beklaga, men me må avlysa båtpåsken i år, seier Odd Lidal, formann i Sauda Motorbåtforening.
Isen på fjorden er fleire stader målt til ein halv meter tjukk. Med kuldegrader i vente den næraste veka, og palmehelga bare ei dryg veke unna, såg ikkje foreininga noko anna utveg enn å avlysa heile båtpåsken i Sauda.
Båtforeininga har vurdert å leiga inn ein isknusar, men dette blei sett på som altfor kostbart.
– Dessutan, viss me knuser isen, blir den jo bare liggande. Den forsvinn ikkje, påpeikar Lidal.
Hamnesjef i motorbåtforeininga, Trygve Snare, fortel at isbrytaren som var på fjorden i dag, onsdag, hadde store problem med å bryta seg gjennom isen.
– Enkelte stader har det nyleg laga seg til ny is. Og til og med den er 10-15 centimeter tjukk, fortel han.
Dette er første gong båtpåsken i Sauda blir avlyst.
– Trist. Veldig trist, vedgår formann Lidal.
Sauda Motorbåtforening taper inntekter som følge av avlysinga. I tillegg blir den lokale turistnæringa, spesielt skisenteret i Svandalen, og handelsstanden ramma økonomisk som følge av at eit par hundre turistar nå må droppa saudaturen i påsken.
70 båteigarar hadde bestilt påskeplass i småbåthamna.