*** Local Caption *** Arkiv: Redaksjon/Avisbilder
STERK INNSATS: "Jernbua" i Turnhallen er nyoppussa. Leiar i turnforeininga, Bodil Sandal, og initiativtakar til oppussinga, Malin Sørsvann, testar utstyret.

Gir jernet for ”Jernbua”

Sauda Turnforening tar grep etter dopingrykte.

– Nå har eg ein god følelse. Endeleg er me på veg oppover igjen etter den vanskelege perioden. Me har gjennomført ein skikkeleg snuoperasjon, seier Bodil Sandal, leiar i Sauda Turnforening.

I fjor haust gjekk det rykte om utstrekt bruk av anabole steroidar i det lokale styrketreningsmiljøet. Sauda Turnforening fekk fleire tips om at dette gjaldt personar som nytta seg av styrketreningsrommet ”Jernbua” i Turnhallen. Turnforeininga kontakta først politiet, Anti-doping Norge og SLT-kooridinator Torbjørn Indrebø. Deretter blei det sett i gang eit arbeid med å endra på rutinane og det blei innført tiltak for å forebygga og hindra bruk av anabole steroidar blant brukarane av ”Jernbua”

I dag er styrketreningsrommet i turnhallen nyoppussa. Golvet er nytt og måla knallgult, veggene er måla lysgrå, speglane er nye og fleire av treningsapparata har fått ei oppfrisking. I tillegg har det blitt investert i nytt utstyr. Eit splitter nytt ”crossfit”-apparat er på veg, og planen er å også pussa opp gangen og garderobane og få opp ei varmepumpe. Initiativtakar til oppussinga, Malin Sørsvann, rosar medlemmane sin ihuga dugnadsinnsats under arbeidet.

– Eg blei heilt rørt. Folk i alle aldrar kom og jobba intenst gjennom ei heil helg, fortel ho.

Turnforeininga har nå innført nye rutinar for bruk av stryketreningsrommet. Nå må alle medlemmane skriva under på ein kontrakt der dei lovar å følga reglane til foreininga. Med dette får dei tilgang til nøkkelen til Turnhallen og styrketreningsrommet mellom klokka sju på morgonen og klokka ti på kvelden. I kjølvatnet av dopingrykta i fjor haust blei aldersgrensa for bruk av ”Jernbua” heva til 18 år. Nå blir truleg grensa sett ned til 16 år.

Styret i turnforeininga har også eit tett samarbeid med Anti-doping Norge. Medan det tidlegare ikkje var forbode å bruka anabole steriodar i Norge, blei dette kriminalisert frå og med 1. juli i år. Bodil Sandal meiner lovforbodet gjer det lettare å kjempa mot doping.