– Me er opptatt av å ta vare på Åbøbyen. Og den beste måten å gjera det på er å ha folk buande der, seier rådmann Wictor Juul.
I kommunestyret sitt møte i morgon, onsdag, får politikarane saka ”Bygningsvern – Åbøbyen” på saklista si. Rådmannen føreslår at kommunestyret vel seks personar som skal sitta i ei såkalla ad hoc-gruppe som skal jobba med nye reguleringsbestemmelsar for Åbøbyen. Ønsket er at arbeidsgruppa presenterer forslag til nye bestemmelsar i løpet av hausten 2014.
Det er politikarane som har etterlyst meir fokus på retningslinjene for byggereglar i Åbøbyen. Bakgrunnen for dette er fleire signal om ulik behandling av byggesaker i det historierike bustadområdet. Medan enkelte huseigarar har gjennomført bygningstekniske endringar på husa sine utan å søka om løyve, har andre søkt og fått avslag. Andre igjen har måtta riva nybygg som er i strid med bygningsvern-reglane som blei utarbeidd på 1980-talet.
Administrasjonen såg i utgangspunktet føre seg å få på plass ei tilsynsordning for å halda skikkeleg kontroll på utviklinga i bydelen, men politikarane meinte at det er viktigare å få på plass tydelege retningslinjer.
Kommunen har tidlegare ikkje drive tilsyn med bustadene i Åbøbyen, men har føretatt enkelte kontrollar basert på meldingar om mulege brot på byggereglar.
I formannskapsmøtet nå i januar bad politikarane rådmannen om å førebu ei sak for kommunestyret, ei sak der det også blir føreslått kva mandat ad hoc-gruppa skal ha for dette arbeidet.
– Politikarane vil at det blir laga meir moderne reglar enn dei som blei laga på 1980-talet. I dag vil folk gjerne ha varmepumpe og garasje. Då må me endra på reglane, seier Juul.
Les meir i papirutgåva eller last ned eavis her