– Me skal finna ei løysing. Me har alt vore i kontakt med foreldra og har lova at me skal skaffa dei barnehageplass om kort tid, seier Jakob Svandal, kommunalsjef oppvekst og kultur i Sauda kommune.
Initiativet til å finna løysingar kom frå barnehagane, som alle opplever fortvilte foreldre som om kort tid ikkje har barnehageplass til sine barn. Ti barn i 0-2-årsalderen står i dag på venteliste for å få plass i ein av dei tre kommunale barnehagane i Sauda; Rustå, Veslefrikk og Leabøen. Tysdag denne veka var dei tre kommunale styrarane og styrar i privatdrivne Brakamoen barnehage, Laila Stødle, i møte med kommunalsjef Svandal.
I dette møtet blei det klart at det er lettast å få til ei løysing i Brakamoen barnehage.
Ei muleg løysing har vore å oppretta ei ny småbarnsavdeling i Brakamoen barnehage, og omorganisera andre avdelingar her ved å ta i bruk areal ved nå nedlagde Birkeland skule. Tanken var at dei ti nye småbarna vil få muleghet til anten å få fast plass i Brakamoen, eller å flytta over til den kommunale barnehagen dei har fått plass i når hausten kjem og hovudopptaka i saudabarnehagane skjer. Alle dei ti på ventelista fekk torsdag spørsmål om dei kunne vera interessert i ei slik løysing tilknytt Brakamoen barnehage.
– Nokon sa ja, andre sa nei og nokon bad om å få tenka på det. Men truleg sit me igjen med to til seks barn, seier Jakob Svandal.
Men, i går ettermiddag, signaliserte fleire pedagogar og tilsette ved Brakamoen barnehage skepsis til ei slik løysing, der små barn kan oppleva belastinga med å begynna i ny barnehage to gonger på få månader.
Dermed er det framleis mykje uvisst korleis kommunen skal løysa utfordringa med å finna plass til dei ti som nå står utan barnehageplass det komande halve året.
Administrasjonen i kommunen har fått ein to veker lang frist på seg til å laga eit nytt, forsvarleg tilbod som tilfredsstiller krava i barnehagelova, og til å presentera kva dette i så fall vil kosta kommunen. Politikarane skal ta stilling til saka i eit ekstraordinært formannskapsmøte 26. februar.
Les meir i papirugåva eller last ned eavis her