Både bustadprosjektet på Teien og dei store hytteutbyggingsplanane i Nordstøldalen er stoppa fordi Statens vegvesen krev eit nytt og betre kryss til fylkesvegen ved Nesbrua. Vegvesenet meiner dagens kryss ikkje er dimensjonert for trafikkauke og har satt som krav at eit nytt kryss må på plass før utbyggingsprosjekta får starte opp.
Men då Sauda kommune begynte å lansere forslag til nytt kryss, oppstod problema. Det nye krysset må oppfylle Statens vegvesen sine krav til frisikt, svingradius og stigningsgrad. Dette har blitt utfordrande å få til i eit område som består av fleire hus, bratte skråningar, ei elv som dominerer området, ein fylkesveg, to bruer og ein tunnel.
Samtidig må forslaget frå kommunen vere økonomisk realiserbart.
Eit hus må bort
Sauda kommune har jobba fram tre ulike løysingar. To av desse løysingane har Statens vegvesen signalisert at dei ikkje kan bli med på. Det gjenståande alternativet har Vegvesenet signalisert at dei kanskje kan godkjenne. Men dette alternativet vil føre til at eit bustadhus må rivast.
Dette forslaget går ut på å flytte dagens kryss lengre vekk frå Nestunnelen og nærare Nesbrua. Vegen opp til Grønsdal, pluss vegen til to frittståande einebustader, blir samla og ført på innsida av fylkesvegen i ei sløyfe gjennom ein privat eigedom, der det i dag står ein einebustad. Der blir vegen kobla saman med Amdalsvegen, og deretter ført ut på Fylkesveg 520. Denne einebustaden må derfor blir fjerna, samtidig som dette området må planerast.
– Huseigaren er informert om at det er dette forslaget me har sendt til Statens vegvesen, opplyser forvaltningsleiar Ørjan Djuv i Sauda kommune.
Sauda kommune har laga ferdig alle teikningane til det nye krysset og dette er nå sendt til Statens vegvesen.
– Det er nå opp til Statens vegvesen om dei vil godkjenne dette alternativet. Me har tidlegare fått signal om at dei er positive til denne løysinga, seier Djuv.
Ny tunnel
I tillegg til at Vegvesenet skal vurdere det nye krysset, er det også to andre forhold som skal vurderast. I handlingsplanen for fylkesvegar er det alt sett av pengar til å ubetre busslommene på kvar side av fylkesvegen mellom Nesbrua og Nestunnelen. I tillegg er det sett av pengar til ein eigen sykkeltunnel parallelt med den eksisterande Nestunnelen. Dagens tunnel har eit svært smalt fortau som ikkje blir sett på som ei god og trafikksikker løysing for dei mjuke trafikkantane.
Sauda kommune har foreslått overfor Vegvesenet at det ikkje blir bygd ein eigen tunnel, men at nåverande tunnel heller blir utvida slik at den ivaretar mjuketrafikkantar på ein betre måte.
– Me har blitt einige med Vegvesenet om at me lager ein felles reguleringsplan for alle desse prosjekta. Vegvesenet har alt fått pengar til dette reguleringsarbeidet i neste års budsjett, opplyser Ørjan Djuv.
Kor høg rekninga blir og korleis kostnadane blir fordelt er ennå ikkje klart ifølge Djuv.
– Her må me finne ei fordeling av utgiftene mellom Rogaland fylkeskommune og Sauda kommune. I tillegg vil det bli vurdert at dei som står bak utbyggingsplanane til nye bustadfelt og hyttefelt, må vere med og ta ein del av rekninga, seier Djuv.
Fleire av utbyggarane er utålmodige og har venta på ei avklaring på nytt kryss slik at dei kan gå i gang med utbyggingsprosjekta.
– Dersom Statens vegvesen gir klarsignal for at dei aksepterer vårt forslag til nytt kryss, må me sjå om me kan få til ein avtale slik at utbyggingane som er satt på vent kan starte opp, utan at dei må vente heilt til reguleringsplanane er ferdige, seier Ørjan Djuv.