Funnen død etter søk
Eldre mann blei onsdag funnen død nær ein skogsbilveg. Politiet mistenker ikkje at noko kriminelt har skjedd.
Ein eldre mann frå Sauda blei måndag meldt sakna av personar som er i familie med mannen.
– Me gjorde ein del undersøkingar i saka og beslutta å få inn politihundar for å gjennomføre søk i terrenget etter den sakna mannen, opplyser lensmann i Sauda, Siri Fisketjøn Indrebø.
Annonse
Onsdag blei tre politihundar sendt til Sauda og politiet starta søket. Rundt klokka 12 onsdag blei mannen funnen død.
– Personen blei funnen i tilknytning til ein skogsbilveg i Sauda, men ute i ulendt terreng. Det kan derfor ha tatt tid å finne mannen dersom me ikkje hadde brukt politihundar, opplyser Fisketjøn Indrebø.
Lensmannen seier til Ryfylke at det ikkje er mistanke om at noko kriminelt skal ha skjedd.
– Den døde vil likevel bli sendt til obduksjon, seier Fisketjøn Indrebø.
Annonse
Lensmannen opplyser til Ryfylke at det i starten ikkje var noko informasjon om at mannen ikkje hadde kome tilbake frå ein tur eller befant seg ute i terrenget.
– Etter at me hadde etterforska og innhenta informasjon, blei det mistenkt at mannen kunne befinne seg ute i terrenget og det blei derfor beslutta å gjennomføre eit søk.
Lensmannen ønsker ikkje å gå inn på kva tid det sist blei gjort observasjon av mannen, og til han blei meldt sakna, men etter det Ryfylke kjenner til skal det ha gått fleire dagar.
