Ikkje bare for Sauda, men for alle distriktskommunar som stod i fare for å mista sitt lokale vegvesen-kontor. Særleg oppløftande er det dersom avgjerda signaliserer at sentrale styresmakter vil legga ei meir heilskapleg vurdering, der samfunnsrekneskapen blir tatt meir omsyn til, til grunn i denne typen saker.
At trafikkstasjonen i Sauda nå blir berga, er sjølvsagt ingen garanti for at alt blir som det har vore eller at kontoret blir verande til evig tid. I takt med utviklinga i samfunnet elles, vil ny teknologi føra til stadige endringar i både offentlege og private tenestetilbod.
«hjelper det lite å fresa frå seg i kommunestyret eller lokalavisa»
Det har lite for seg å kjempa imot utviklinga. Det har derimot mykje for seg å seia frå når iveren etter å forenkla spring ifrå og realiserer gevinstar av løysingar som ikkje finst. Då må rasjonaliseringskåte byråkratar settast på plass av dei som er valt til å snakka folket si sak i møte med embetsverket. Slik som i trafikkstasjonsaka, der lokale folkevalde har stått på for å få fram kor urimelege konsekvensane av den føreslåtte omstruktureringa er for innbyggarane ute i distrikta.
«det er muleg å få gjennomslag, sjølv for parti som ikkje sit i regjering»
Den siste utviklinga i trafikkstasjonsaka viser kor viktig det er å ha lokale folkevalde som også arbeider med saker av regional og nasjonal karakter. Når frustrasjonane lokalt er retta mot avgjerder fatta på fylkesnivå eller i statlege organ, hjelper det lite å fresa frå seg i kommunestyret eller lokalavisa om ein ikkje samtidig arbeider aktivt inn mot dei som faktisk kan gjera noko med saka. Alle dei lokale partia i Sauda har representantar på Stortinget som kan kontaktast, og dei siste vekene har vist at det er muleg å få gjennomslag, sjølv for parti som ikkje sit i regjering. I trafikkstasjonsaka har fleire engasjert seg – det fortener lokalpolitikarane ros for.
Statens vegvesen sitt forslag frå mai 2019 om nedlegging av 22 trafikkstasjonar blei ikkje uventa møtt med stor motstand ute i distrikta. Ikkje bare ville tilbodet til innbyggarane i desse områda bli markant dårlegare. Endringa ville òg pålegga brukarane betydelege kostnader i form av reisetid og -utgifter, i tillegg til ein lite flatterande miljørekneskap.
I avgjerda om å skrota Vegvesenet sitt forslag, ligg klare føringar om at endringar i tenestetilbodet ved trafikkstasjonane ikkje skal føra til eit dårlegare tilbod. Viss denne tilnærminga er «den nye vinen» frå sentralt hald, takkar me høfleg ja til meir.