Blant dei tre forslaga som blei sendt ut å høyring, kjem Sauda og indre strok best ut av alternativ 3. Dette alternativet inneber eit tilbod som i det store og heile bare er litt dårlegare enn i dag. Kommunestyret i Sauda valde likevel å senda inn sitt eige alternativ, alternativ 4, som ikkje bare opprettheld, men også betrar rutetilbodet for Indre Ryfylke samanlikna med i dag.
«For Indre Ryfylke sin del står likevel den viktigaste jobben att»
Omfordelinga av midlar i kommuneproposisjonen har sjølvsagt ikkje kome heilt av seg sjølv. Her er det gjort ein god jobb for å overtyda sentrale styresmakter om behovet for og betydinga av eit godt båtrutetilbod i Ryfylke. For Indre Ryfylke sin del står likevel den viktigaste jobben att: Å få fylkespolitikarane til å forstå viktigheita av eit oppegåande kollektivtilbod også i det nordaustre hjørnet av fylket.
«ikkje urimeleg at betre kommunikasjonar i Ytre Ryfylke kjem indre strok til gode»
Det er ikkje urimeleg å krevja at store investeringar i infrastruktur skal konverterast til innsparingar i kollektivtrafikken. Innsparingane må imidlertid først og fremst skje der bruene og tunnelane er bygd. Det er heller ikkje urimeleg at betre kommunikasjonar i Ytre Ryfylke kjem indre strok til gode, mellom anna i form av færre båtanløp der ute og med det kortare reisetid mellom endepunkta Sauda og Stavanger.
– Eit godt rutetilbod i Ryfylke er avgjerande for Rogaland fylkeskommune, og me kjem til å gjera alt i vår makt for å sikre eit fortsatt godt tilbod, slo fylkesordførar Marianne Chesak fast i eit intervju med Ryfylke for ganske nøyaktig eitt år sidan. Det burde vera unødvendig å presisera at eit godt rutetilbod i Ryfylke også må bety eit godt rutetilbod i Indre Ryfylke.
At Alternativ 3 ser ut til å få størst oppslutnad i høyringsrunden, betyr ikkje at dette gir eit godt og framtidsretta rutetilbod på Ryfylkefjordane. I valet mellom fleire vonder, vil alle velja det som smertar minst.
Med 16 millionar kroner meir å kjøra båt for har fylkespolitikarane fått eit utmerka høve til å sjå nærare på mulegheitene for å gi rutetilbodet i Indre Ryfylke eit løft. Det bør først og fremst skje ved at ein greier ut Alternativ 4 og lar dette bli ein del av saka i fortsettinga.