I ei stadig meir digitalisert verd, er dei fleste varer bare eit par tastetrykk unna. I nettbutikkane kan ein handla når ein vil og ofte til gunstige prisar, noko som gjer konkurransen svært utfordrande for småbutikkane i ein sørvestnorsk småby. «Butikkar» utan butikklokale, bare eit lager, med heile verda som kundar, har sjølvsagt òg eit større utval enn fysiske butikkar har sjans til å ha. «Feige lag» ville me slått fast i løkkefotballens stordomstid for nokre tiår sidan. Trass i at 80- og 90-talets store, stygge handelsulv, handelslekkasjen til Haugesund, framleis lever, er det netthandelen som i dag er den store konkurrenten for den lokale handelsstanden.
«Kva med å først og fremst tenka lokalt når årets julegåver skal kjøpast inn?»
Ein treng ikkje vera patriot for å forstå at det ein sparer på å handla på nettet i dag, lett kan bli ei dårleg investering på lenger sikt. Butikkdød er absolutt eit kjent fenomen, både i Sauda og i landet elles. Hovudorganisasjonen Virke reknar med at så mange som 40 000 tilsette i varehandelen vil mista jobben som følge av nedleggingar det neste tiåret. Ein god julehandel utgjer ein stor del av årsomsetnaden i detaljhandelen og er viktig ikkje bare i Sauda, men i heile landet.
«Ein god julehandel utgjer ein stor del av årsomsetnaden i detaljhandelen»
Eit levande sentrum, med lys i butikkvindauga, er avhengig av at det finst handel. Då må både heil- og deltidsinnbyggarar kjenna si besøkelsestid. Det må også dei næringsdrivande. Det er deira eigen jobb å overtyda kundane om at pris, service og hyggelege handleopplevingar i sentrumsbutikken gir meir verdi enn tastehandelen heimefrå. I det reknestykket skal ein òg ta med at det er dei lokale butikkane som gir foreininga premiar til utloddingar, som gjerne gir lokal ungdom ein deltids- eller sommarjobb og som stiller velvillig opp og hjelper deg når vara du kjøpte ikkje var heilt som ho skulle.
Det er derfor slett ikkje sikkert at ei vare i nettbutikken er billegare enn den same vara i ein lokal butikk, sjølv om prislappen får det til å sjå slik ut. Sluttsummen blir opp til den enkelte å vurdera, men dei lokale butikkane fortener uansett ein sjanse, og gjerne under årets julehandel.