Utdanningsforbundet-leiar Steffen Handal er skuffa og seier det er sterkt beklageleg at regjeringa no grip inn i lærarstreiken med tvungen lønnsnemnd.
– Det er ein mørk dag. KS har vunne fram, og skulen tapte, sa Handal til pressa etter at det tysdag kveld vart kjend at regjeringa grip inn i lærarstreiken.
– Det er sterkt beklageleg at regjeringa har valt å gripe inn med tvungen lønnsnemnd. Dei tek no på seg eit stort ansvar for det som har vore grunnlaget for konflikten, la han til.
Handal har fleire gonger sagt at Utdanningsforbundet har opplevd KS som tilbakelente gjennom heile streiken og har tidlegare skulda dei for å styre mot tvungen lønnsnemnd.
– Dei har vilja alt anna enn å sitje ved forhandlingsbordet med lærarane. Dei har brukt konflikten til å snakke ned lærarkompetansen.
Lektorlaget om tvungen lønnsnemnd: – Sinte og skuffa
Arbeidstakarorganisasjonane er ikkje fornøgde med at lærarstreiken enda i forslag om tvungen lønnsnemnd. Norsk Lektorlag seier dei er sinte og skuffa.
– Det er faktisk ikkje mogleg å vere noko anna på vegner av alle dei lektormedlemmene og den fellesskulen dei kjempar for, seier Helle Nyhuus, leiar i Norsk Lektorlag.
Tysdag kveld vart det klart at regjeringa avsluttar den langvarige lærarstreiken med tvungen lønnsnemnd. Norsk Lektorlag har streika saman med Utdanningsforbundet og Skolenes landsforbund sidan juni. Rundt 8.500 medlemmer var i streik då regjeringa greip inn.
– Eg vil seie beklagar til elevane. Både for at de faktisk ikkje har fått undervisning, og for at vi i dag ikkje har fått gjennomslag for å sikre fellesskulen framover. Det er ein mørk dag, seier Nyhuus, og sluttar seg med det til orda til Steffen Handal, leiar for Utdanningsforbundet.
KS om tvungen lønnsnemnd: – Må sjå framover
Arbeidsgivarsida i lærarstreiken, KS, seier dei er glade for at streiken no blir avslutta etter at regjeringa vedtok å foreslå tvungen lønnsnemnd.
– Det er svært synd at partane ikkje klarte å bli samde om ei løysing og at det må tvungen lønnsnemnd til. Men vi er svært glade for at 150.000 barn og unge som er ramma av streiken, no kan komme tilbake på skulen, seier KS» arbeidslivsdirektør Tor Arne Gangsø.
Regjeringa ved arbeidsminister Marte Mjøs Persen (Ap) foreslo tysdag kveld tvungen lønnsnemnd for å avslutte lærarstreiken. Streiken har gått føre seg sidan juni. At tvungen lønnsnemnd blir foreslått, betyr at lærarane skal tilbake på jobb så fort som mogleg, truleg allereie onsdag morgon.
– No må partane sjå framover og byggje opp gjensidig tillit. Vi må finne ut korleis vi kan samarbeide betre med kvarandre, og med politiske styresmakter, om å utvikle skulen slik at han blir best mogleg, seier Gangsø.
(©NPK)