I dag, torsdag, blir Refleksdagen markert i heile landet. Trygg Trafikk, som arrangerer markeringa, skriv at formålet er å få folk til å bruke refleks, og dermed unngå ulukker. Politiet besøker denne veka skulane i Sauda for å skape bevisstheit rundt refleksbruk. I morgontimane torsdag sto Fløgstad skule for tur, og politiet opplyser at det stort sett er positive haldningar å rapportere om. Politistasjonssjef Jarle Grindheim fortel til Ryfylke at politiet kvart år gjennomfører desse besøka på skulane.
– Stort sett er folk flinke, men det er som regel nokon som treng ei påminning. Vi er på veg inn i ei tid der det er mørkt når barna begynner på skulen, og då er refleksbruk veldig viktig. Dette må foreldre vere bevisst på, seier han.
Politiet opplyser at alle skulane i Sauda blir besøkt i samband med den mørke årstida og refleksbruk. Trygg Trafikk skildrar på sin nettstad refleks som den billigaste livsforsikringa ein kan ha, og oppfordrar alle som ferdast i trafikken til å ha minst to refleksar på seg, slik at ein er synleg frå fleire kantar.