Illustrasjonsfoto:
Håkon Mosvold Larsen / NTB / NPK
Me sparte på straumen i haust
Straumforbruket gjekk ned i september og oktober samanlikna med 2021, viser nye analysar frå Noregs vassdrags- og energidirektorat (NVE).
Hushalda i sørlege Noreg har redusert straumforbruket med heile 17 prosent i september og 14 prosent i oktober samanlikna med i fjor, skriv NVE i ei pressemelding.
Tala er korrigert for temperaturvariasjonar.
– Kraftforbruket for heile landet så langt i år er redusert med 6,1 TWh frå i fjor. Det er tydeleg at mange no sparer straum, seier vassdrags- og energidirektør Kjetil Lund.
I industrien og i tenesteytande sektor har også forbruket av straum gått ned no i haust. I tenesteytande sektor var nedgangen i forbruket i sørlege Noreg på 2,4 prosent og 5,1 prosent. Industrien i sørlege Noreg reduserte forbruket med 7,1 prosent og 5,9 prosent. Dette kjem først og fremst av reduksjon i aluminiumproduksjon.
(NPK)
