Dramatisk da turfølge måtte bryte seg inn i hytte

Fredag ettermiddag kjørte Oddgeir Hjelmtveit frå Tysvær inn til Sauda saman med ei turvenninne for å gå til Storevassbu for å overnatte der.

– Me starta litt seint på ettermiddagen, men hadde med oss lykter da me skjønte at det ville bli mørkt før me kom fram, opplyser Hjelmtveit til Ryfylke.

Turen skulle bli meir dramatisk enn kva den fjellvante tysværbuen hadde sett for seg.

– Like bak oss kom tre unge, utanlandske studentar som studerte i Stavanger. Dei hadde gått frå fylkesvegen og skulle også til Storevassbu. Destod lenger opp i fjellet me kom, jo meir snø blei det. Me gjekk til fots og visste ikkje at det var så mykje snø. Me vassa til knes, men i periodar gjekk me med snø opp til livet, opplyser Hjelmtveit.

Storavatnet og elver var ikkje frose.

– Me gjekk igjennom der det var elver og blei etter kvart våte og kalde. Studentane begynte etter kvart å bli i dårleg forfatning. Da me var med Storavatnet ville dei forsøke å nå fram til Storavassbu. Eg visste at det er kupert og ville bli vanskeleg å nå fram dit for studentane i mørket, opplyser Hjelmtveit.

– Ikkje kjekt å bryte seg inn

Han er godt fjellvant og hadde med seg utstyr og mat til å klare seg. Det hadde ikkje studentane. Han tok derfor valet om å bryte seg inn i ei hytte.

– Det var ikkje kjekt å skulle bryte seg inn i ei privat hytte, men eg tør ikkje tenke på kva som hadde skjedd dersom studentane hadde fortsatt mot Storavassbu, seier Hjelmtveit.

Han hadde med seg satellittelefon og sendte melding til mor si og bad ho informere politiet om at dei braut seg inn i ein hytte.

– Inne i hytta fyrte me opp med ved, pluss brukte gass til å varme opp maten eg hadde med. I tillegg var det fem oppreidde senger der som me brukte. Me overnatta der, vaska opp etter oss og gjekk ned saman dagen etter. Eg spikra igjen hyttedøra slik at den ikkje blei ståande åpen. Eg kjørte dei frå parkeringsplassen i Nordstøldalen og til hurtigbåten, opplyser Hjelmtveit.

– Han gjorde heilt rett

Hytteeigar Knut Risvold Aalvik seier til Ryfylke at Hjelmtveit gjorde heilt rett når han braut seg inn i hytta, når situasjonen blei så dramatisk som den blei.

– Det var eit klokt val. Liv og helse kjem foran skader på ei dør. Det her er ein fjellvant og fornuftig kar og som i tillegg ønsker å gjere opp for seg, seier Risvold Aalvik.

Hjelmtveit skal inn til Sauda i helga. Da tar han med seg utstyr for å reparere hyttedøra.

– Hjelmtveit sa at han ville ta med seg ved som han ville dra på pulk, men da sa eg nei, nei,nei! Det skal du ikkje gjere! Eg fraktar inn ved sjølv seinare i vinter, seier hytteeigaren.

Tar på seg å reparere døra

Hjelmtveit opplyser til Ryfylke at han i det minste skal ta av sengetøyet på dei fem sengene og frakte ned til Risvold Aalvik, slik at dei får vaska det etter at turfølget måtte låne sengene deira.

Sjølv om Oddgeir Hjelmtveit er godt fjellvant og gjerne drar til fjells med utstyr for å overnatte ut, erkjenner han at det ikkje var rett å forsette når det var mykje meir snø enn kva dei hadde trudd.

– Det rette valet her hadde vore å snu, smiler Hjemtveit, glad for at det likevel endte godt for alle fem, og glad for at hytteeigar Knut Risvold Aalvik reagerte på ein så positiv og forståelsesfull måte over at dei måtte bryte seg inn i hytta hans.