Einar deltar i det 1 300 kilometer lange sykkelrittet for første gong
Einar Haugen har lagt i hardtrening sidan september. I slutten av juni deltar han og tre andre saudabuar på det meir enn 1 300 kilometer lange Team Rynkeby-rittet frå Oslo til Paris.
– Det har vore ganske mykje trening sidan eg blei lokka inn i dette av min kollega Sander Stielstra. Det har vore to-tre økter i veka, og det går overraskande bra. Eg ser med både spenning og glede fram til løpet, seier saudabuen Einar Haugen.
Han jobbar til dagleg på Sauda vidaregåande skule, der kollega Sander Stielstra også er tilsett. Stielstra har deltatt i Team Rynkebys årlege ritt fleire gonger tidlegare. Denne gangen greidde Stielstra å overtale Haugen til å ta det store steget å delta sjølv, noko som ikkje er ei oppgåve å sjå lett på.
Annonse
– For det første er det ei investering i både sykkel, utstyr, klede og tur. Det har blitt omlag 50 000 kroner. Då kan ein ikkje gjere det halvvegs. Eg har hatt faste treningar fleire gonger i veka, og vi har hatt nokre lengre turar saman, vi som er på lag, fortel Haugen.
– Imponerande
Haugen og Stielstra er to av dei fire deltakarane frå Sauda i årets ritt. Dei to andre er Stielstras kone Vanessa Venema og Bjørn Egil Rossebø. Dei er all fire med i Team Rynkeby Haugaland, som til saman tel omlag 30 ryttarar.
Team Rynkebys årlege ritt går frå Københamn til Paris. Turen er i overkant av 1 300 kilometer lang, og deltakarane frå Norge startar med ein prolog i Oslo, før turen til Danmark går med båt.
Annonse
– Det er eit veldig imponerande lag vi har på Haugalandet, med ryttarar frå 24 til 73 år, fortel Haugen.
Viktig formål
Haugen har sjølv ikkje noko erfaring med verkeleg lange sykkelritt, og han innrømmer at det er mykje spenning når rittet no nærmar seg.
– Eg meiner eg har gjort ein bra jobb med førebuingane. Til no har eg omlag 2 300 kilometer bak meg på sykkelsetet. Det er litt sprøtt å vite at eg skal delta på noko slikt som dette, men no er det all in» og ingen veg tilbake, seier han.
Team Rynkeby sitt årlege ritt har omlag 2 000 deltakarar frå ei rekke land. Alt av overskot frå rittet går til Barnekreftforeininga, og deltakarane driv også med innsamling i form av loddsal, sponsorsal, flaskeinnsamling og arrangering av skuleløp.
– I Team Rynkeby Haugaland har vi samla inn godt og vel ein million kroner totalt. Det er 10 lag i Norge som har gjort det same. Det er ei viktig sak å støtte, og vi håpar at endå fleire ryttarar har lyst å bli med neste år, seier Haugen til slutt.
