På ein strålande flott vinterdag i dag, tysdag, hadde Karl Gustav Lofthus og medarbeidarane hans ein travel føremiddag. Først la det is på tennisbanane i Åbøbyen, deretter stod Rådhusplassen for tur.
På Rådhusplassen la karane ein plastduk over grusen før dei sprøyta det varme vatnet over den komande skøytebanen.
– Me prøver dette, konstaterer Karl Gustav Lofthus.
Plastduken skal hindra at vatnet trenger ned i grusdekket.
Så om vermeldinga held stikk og kuldegradene varer ved, kan saudabuen spenna på seg skøytene og boltra seg på glattisen både midt i sentrum og i Åbøyen.
Ein islagt Rådhusplass har eit par vintrar no vore eit svært populært innslag i vinter-Sauda.