Sommaren legg inn eit ekstrabesøk til Sauda denne onsdagsføremiddagen. På Teig er Nicholas Guindani i fullt arbeid som handverkar. Siste hand skal leggast på produksjonslokalet og utsalet i det store, raude huset som gir plass til Ryfylke Mat AS.
– Litt listing, nokre småjobbar elles og ein skikkeleg nedvask står att, så er alt klart, konstaterer han.
Samstundes konstaterer han at alt det gjenståande småarbeidet, og nedvasken, sjølvsagt, må vera unnagjort i løpet av dagen i dag, fredag. I kveld skal Guindani nemleg realisera draumen sin og byrja å arbeida med det han er utdanna til og brenn for: Å laga mat. Av lokale råvarer. Då får han nemleg inn dei første dyreskrottane til vidareforedling. Komande tysdag ligg dei første ferdigprodukta klare i kjøledisken i utsalsdelen av produksjonslokalet.
– Ti forskjellige sortar pølse, pålegg, rullar, postei, spekemat og så vidare, og pinnekjøt til jul. Eg får ta eit steg om gongen, ein stad må eg byrja. Og så får eg sjå kva marknaden etterspør, kva kundane ønsker, forklarer gründeren.
No, til den innleiande prøveproduksjonen i helga, får han grise- og storfekjøt levert av Nortura. Dét er ei ordning den faglærte kokken ikkje skal basera verksemda på. Sjølve grunnlaget for Ryfylke Mat AS er nemleg å tilby mat laga av lokale råvarer. Når Kjell Idar Rafdal seinare i haust hentar lamma sine ned frå Kvanndal, vil fleire av desse enda hos Nicholas Guindani. På same måte har Dagfinn og Stephanie Birkeland i Saudasjøen utegåande griser som spring rundt og et urter og røter. Noko som gir kjøt av nettopp den høge, spesielle kvaliteten Guindani krev.
Les meir i papirutgåva eller last ned eavis her