– Eg tok leiinga ganske tidleg. Målet mitt var å ta løyperekorden, innrømmer Torstein Tengsareid, som vann med tida 41 minutt og 47 sekund.
Dette er snaue to minutt raskare enn løyperekorden Johan Bugge sette i 2015.
Sørlendingen var oppe på nuten heile eitt minutt og 50 sekund før nummer to, tidlegare norgesmeister i motbakkeløp, Torbjørn T. Ludvigsen. På tredjeplass kom suldølen Glenn Tore Løland med tida 46.10. Alle dei tre raskaste mennene deltok i klassen menn 25-29 år.
Blant damene såg det lenge ut for at Merete Weng, søstera til skiløpar og løyperekord-haldar Heidi Weng, skulle ta sigeren. Opp stølsbakkane leia ho an med May Britt Buer hakk i hæl. I dei bratte bakkane var det likevel Buer som var sterkast. Ho gjekk forbi og slo Weng med åtte sekund. Buer fekk tida 53 minutt og 53 sekund
Tidlegare toppidrettsutøvar Kristen Skjeldal var i år tilbake i Sauda for å delta i Hovlandsnuten Opp.
Han meiner at bare det å vera oppe på den 931 meter høge nuten er ein premie i seg sjølv.
– Fantastisk flott utsikt, og utruleg bra med den utsiktshytta der oppe. Alt i alt gjer arrangøren ein kjempejobb. Dei klarer å laga løpet til ein folkefest, med ein slik stolthet, entusiasme, atmosfære og humør at det er heilt utruleg. Eg trur dessutan at alle grepa ein har gjort, med ny trasé, eventyrskog, steintrapper og utsiktshytte bidrar til at endå fleire vil ta turen opp til nuten, seier Skjeldal.
Les meir i papirutgåva tysdag