Natt til søndag 31. oktober skal klokka stillast èin time tilbake då sommartida skal tilbake til normaltid. Ny-utnemnt næringsminister Jan Christian Vestre oppmodar folk til å nytta den ekstra timen godt.
– I motsetnad til i fjor haust kan vaksinerte nå klemma kvarandre igjen. Det synest eg alle bør prioritera, seier Vestre.
Næringsministeren er ansvarleg statsråd for justervesenet, noko som også gjer han til landets «tidsminister».
I 2018 la Europakommisjonen fram eit forslag om å avvikla ordninga med å stilla klokka fram og tilbake. Europaparlamentet stemte forslaget gjennom i mars 2019 og har sidan då lege til behandling hos Rådet for den Europeiske Union. Herfrå har det ennå ikkje kome noko avgjerd, og Komiteen for transport og turisme i Europaparlamentet har nå bede Rådet om å få fortgang i arbeidet.
Norge har i denne omgang hatt sommartid sidan 1980, men var alt i 1916 innom ordninga som såg dagens lys under første verdskrig med mål om å spara kol som skulle nyttast i krigen.