Sauda IL sitt J15-lag fekk ikkje fullført serien, men enda likevel opp som vinnarar av si førstedivisjonspulje.
– Smittesituasjonen i distriktet gjorde at ingen av laga fekk spelt den siste kampen, som blei sett til tap for alle laga, opplyser trenar Asbjørn Skoglund.
Før sesongen blei avblåst rakk saudajentene å vinna 9-2 borte mot Vindafjord/Vats/Skjoldar/Vikebygd. På det som blir sluttabellen, toppar Sauda med 34 poeng, to foran Torvastad, med 11 sigrar, ein uavgjort og eitt tap, pluss «tapet» i siste serierunde.
Målforskjellen er formidable 106-35, og Signe Saltnes Aarhus er suveren toppscorar i avdelinga med 65 fulltreffarar, 45 meir enn nummer to på lista.
Første-, tredje- og fjerdeplass
Sauda IL G14 avslutta sesongen med stil og vann 5-2 borte mot Nord 2 og uavgjort 1-1 heime mot det suverene vinnarlaget Nord 1. Laget hamna til slutt på fjerdeplass i si andredivisjonspulje.
G16 vann siste seriekamp 4-2 mot Ølen 2, men tapte andreplassen i tredjedivisjonspulja for same lag på målforskjell.
Sauda IL G13 vann 2. divisjon avdeling 6, to poeng foran Vedavåg Karmøy.